އޭޝިޔާގެ ޤައުމުތަކަށް ކުރައްވާ ދިގު ދަތުރުފުޅުގައި އެމެރިކާގެ ރައީސް ޑޮނަލްޑް ޓްރަމްޕް ފިލިޕީންސަށް ވަޑައިގެންފިއެވެ.
ފިލިޕީންސްގެ މެނީލާއިން ޓްރަމްޕަށް ކުރިމަތިލައްވަން ޖެހިވަޑައިގަތީ އޭނާގެ ސިޔާސަތުތަކާ ދެކޮޅަށް އިޙުތިޖާޖުކުރާ އެތަށް ހާސް ބައެއްގެ މުޒާހަރާތަކާއެވެ. މުޒާހަރާކުރި މީހުންނާ ހެދި މެނީލާގައި ހުންނަ އެމެރިކާގެ އެމްބަސީއަށް ވަދެވަޑައިގަތުމަށް ޓްރަމްޕަށް ދަތިވުމުން ފިލިޕީންސްގެ ފުލުހުންވަނީ ބާރުގެ ބޭނުންކޮށްގެން މުޒާހަރާ ކުރި މީހުން އެމެރިކާގެ އެމްބަސީ ހުރި ސަރަހައްދުން ދުރުކޮށްފައެވެ.
img:http://s2.psmnews.mv/images/660x400/15105144295667.jpg|ޓްރަމްޕްގެ ޒިޔާރަތާ ދިމާކޮށް މެނީލާގައި މުޒާހަރާކުރި މީހުން ހުްޓުވުމަށް ފެން ޖަހަނީ- ފޮޓޯ: ދި އިންޑިޕެންޑެންޓް
ޓްރަމްޕާއި ފިލިޕީންސްގެ ރައީސް ޑުޓަރޓޭގެ ރަސްމީ މަޝްވަރާތަކުގެ އެޖެންޑާގައި ހިމެނެނީ ޓެރަރިޒަމާ ދެކޮޅަށް ހަނގުރާމަކުރުމުގައި ދެ ޤައުމު ގުޅިގެން މަސައްކަތްކުރުމާއި އެމެރިކާގެ އަސްކަރީ އެހީ ފިލިޕީންސަށް ދިނުމާއި ޕިލިޕީންސްގައި ތިބޭ އެމެރިކާގެ އަސްކަރީ އޮފިޝަލުންނާ ބެހޭގޮތުންނެވެ.
ނަމަވެސް ޑުޓަރޓޭ ވަނީ އިންސާނީ ޙައްޤުތަކުގެ ނަމުގައި ޓްރަމްޕާ މަޝްވަރާ ނުކުރައްވާނެކަމަށް ވިދާޅުވެފައެވެ. މި ގޮތުން ދެ ބޭފުޅުންގެ މަޝްވަރާތަކުގެ އެޖެންޑާގައި އިންސާނީ ޙައްޤުތަކުގެ މައްސަލަ ނުހިމެނުމަށް އެމެރިކާގެ މަސްއޫލުވެރިންގެ ކިބައިން ޑުޓަރޓޭ ވަނީ އެދިވަޑައިގެންފައެވެ.