މި ހަފުތާގެ އާދިއްތަ ދުވަހު އީރާނާއި އިރާޤު ގުޅޭ ސަރަހައްދަށް އައި ބާރުގަދަ ބިންހެލުމަށްފަހު އީރާނުގެ އެތައް ހާސް މީހުން، ބޯހިޔާވަހިކަން ނުލިބި، ހާމަ ބިންތަކުގައި ދެވަނަ ރެއެއް ހޭދަކުރަން ޖެހިއްޖެއެވެ.
އީރާނުގެ ހުޅަނގުގެ ސަރަހައްދަށް އައި މި ބިންހެލުމަކީ ރިކްޓަރ ސްކޭލުން 7.3ގެ ބާރުމިނުގައި އައި ބިންހެލުމެކެވެ. މި ހާދިސާގައި އެ ޤައުމުގެ 430 އަށް ވުރެ ގިނަ މީހުން މަރުވެ 7000 މީހުން ޒަޚަމުވެފައިވާކަމަށް އީރާނުގެ މީޑިއާއިން ރިޕޯޓުކުރެއެވެ.
ތަޖުރިބާކާރުން ބުނާ ގޮތުން މިއީ 2017 ވަނަ އަހަރުގެ ތެރޭގައި އައި އެންމެ ބާރުގަދަ އަދި އެންމެ ގެއްލުން ބޮޑު ބިންހެލުމެވެ. މި ބިންހެލުމުގެ ސަބަބުން އަވަށްޓެރި އިރާޤުގެ 9 މީހަކު މަރުވެ، އެތައް ސަތޭކަ ބަޔަކު ޒަޚަމްވެފައިވާކަމަށް އިރާޤުގެ ރިޕޯޓްތައް ބުނެއެވެ. ބިންހެލުމަށްފަހު އީރާނުގެ ހުޅަނގުގެ ސަރަހައްދުތަކުގައި އުޅޭ އެތައް ހާސް ބަޔަކު ހާމަ ބިންތަކުގައި، ގަދަ ފިނީގައި ދެ ރޭ ހޭދަކުރަން ޖެހިފައިވަނީ އެ ސަރަހައްދުތަކުގައި ވަގުތީ ހިޔާތައް ޤާއިމުކުރުމަށް އީރާނުގެ ސަރުކާރުން ނުކުޅެދިފައިވާތީކަމަށް ބީ.ބީ.ސީން ރިޕޯޓް ކުރެއެވެ.
އަދި ވަގުތީ ހިޔާތައް ޤާއިމުކުރުމުގެ މަސައްކަތްތައް ލަސްވެފައިވަނީ، ބިންހެލުން އައި ސަރަހައްދަކީ ފަރުބަދަމަތީގެ ސަރަހައްދަކަށް ވެފައި، މިކަމަށް ބޭނުންވާ ސާމާނު އެ ސަރަހައްދަށް ގެންދަން އުނދަގޫވުމުގެ ސަބަބުންކަމަށް އީރާނުގެ ކަމާ ބެހޭ ފަރާތްތަކުން ބުނެއެވެ. ބިންހެލުމުގެ ސަބަބުން ހާލުގައިޖެހުނު ފަރާތްތަކަށް އިންސާނީ އެހިގެ ސާމާނު ފޯރުކޮށްދިނުމުމުގައި ވެސް އީރާނުގެ ކަމާބެހޭ ފަރާތްތަކަށް ދަނީ ހުރަސްތަކާ ކުރިމަތިވަމުންނެވެ.