ސޫރިޔާގައި ހަރަކާތްތެރިވާ އައި.އެސް. ޖަމާޢަތަށް އެމެރިކާއިން ހިޔާމަތް ދީފައިވާކަމަށް ރަޝިޔާއިން ތުހުމަތުކޮށްފިއެވެ. ޓެރަރިޒަމާ ހަނގުރާމަކުރުމުގެ ނަމުގައި އެމެރިކާއިން އައި.އެސް. ޖަމާޢަތަށް ސޫރިޔާގައި ހިމާޔަތާއި ރައްކާތެރިކަން ދިންކަމަށާއި، މިގޮތުން ރަޝިޔާއިން އައިއެސްއަށް ދިން ވައިގެ ޙަމަލާތަކަށް ހުރަސްއަޅަންވެސް އެމެރިކާއިން މަސައްކަތް ކޮށްފައިވާކަމަށް، ރަޝިޔާގެ ދިފާޢީ ވުޒާރާއިން ބުންޏެވެ.
ރަޝިޔާގެ ދިފާޢީ ވުޒާރާއިން ނެރުނު ބަޔާނެއްގައި ބުނެފައިވަނީ އެމެރިކާއިން އައި.އެސް.އާ ދެކޮޅަށް ޙަޤީޤީ ހަނގުރާމައެއް ކުރިނަމަ، މީގެ އެތަށް އަހަރެއް ކުރިން، އައި.އެސް ޖަމާއަތް ބަލިކޮށްލެވުނީސްކަމަށް އެ ވުޒާރާއިން ބުނެފައިވެއެވެ. އަދި ސޫރިޔާގެ ސަރުކާރަށް ފިއްތުންތައް ކުރިމަތިކުރުމަށްޓަކައި އެމެރިކާއިން އައި.އެސް.ގެ ހަނގުރާމަވެރިން، ސިޔާސީ ހަތިޔާރެއްގެ ގޮތުގައި ބޭނުންކޮށްފައިވާކަމަށްވެސް ރަޝިޔާގެ ދިފާޢީ ވުޒާރާގެ ބަޔާނުގައިވެއެވެ.
އެމެރިކާއިން އައި.އެސް.ގެ ބައެއް ހަރަކާތްތަކަށް އެހީތެރިވެފައިވާކަން، އެމެރިކާގެ ރިޔާސީ އިންތިޚާބުގެ ދުވަސްވަރު ވިކިލީކްސް އިން ބޭޒާރުކޮށްލާފައިވާ އެމެރިކާގެ ސިއްރު ލިޔެކިޔުންތަކަކުންވެސް ވަނީ ހާމަވެފައެވެ.