ބަންގްލަދޭޝްގެ ސަރަހައްދީ ރޮނގުގެ ކައިރިއަށް ޖަމާވެފައިވާ މިޔަންމާގެ ރޮހިންޔާ ރެފިއުޖީންގެ މައްސަލަ، ވާހަކަދައްކައިގެން ހައްލުކުރުމަށް ޗައިނާއިން އެ ދެ ޤައުމަށް ގޮވާލައިފިއެވެ.
ޗައިނާގެ ޚާރިޖީ ވަޒީރު ވާންގް ޔީ މި މޭރުމުން ވާހަކަފުޅު ދައްކަވާފައިވަނީ، ބަންގްލަދޭޝަށް ކުރައްވަމުން ގެންދަވާ ދަތުރުފުޅެއްގައެވެ. ރޮހިންޔާ ރެފިއުޖީންނަށް އެ މީހުންގެ ވަޒަނަށް އެނބުރި ރުޖޫޢަވުމުގެ ޙައްޤު ލިބިގެންވާ ކަމަށާއި މިކަން ޙައްލުކުރުމަށް އޮތް އެންމެ ރަނގަޅު ގޮތަކީ ބަންގްލަދޭޝާއި މިޔަންމާއިން މަޝްވަރާކޮށްގެން މައްސަލަ ޙައްލުކުރުންކަމަށް އެމަނިކުފާނު ވިދާޅުވިއެވެ.
ރޮހިންޔާ ރެފިއުޖީންގެ މައްސަލަ ބައިނަލްއަޤުވާމީ މައްސަލައަކަށް ހެދުމުގެ ބަދަލުގައި މިޔަންމާ އާއި ބަންގްލަދޭޝްގެ މަސްއޫލުވެރިން ވާހަކަދައްކައިގެން އެ މައްސަލަ ހައްލުކުރުން މާރަނގަޅުވާނެކަމަށް ވާންގް ޔީ ވިދާޅުވިއެވެ.
ޗައިނާގެ ޚާރިޖީ ވަޒީރު ބަންގްލަދޭޝަށް ކުރައްވަމުން ގެންދަވާ ދަތުރުފުޅުގައި ބަންގްލަދޭޝްގެ ޚާރިޖީ ވަޒީރު އަބުލްޙަސަން މަހްމޫދާ ވަނީ ބައްދަލުކުރައްވާފައެވެ. މީގެ އިތުރުން ޗައިނާގެ ޚާރިޖީ ވަޒީރު، ބަންގްލަދޭޝްގެ ބޮޑުވަޒީރު ޝައިޚް ޙަސީނާއާ ބައްދަލުކުރެއްވުމަށްވެސް ވަނީ ހަމަޖެހިފައެވެ.
ބަންގްލަދޭޝްގެ ސަރަހައްދީ ރޮނގުގެ ކައިރީގައި ވަރަށް ދަތި ޙާލުގައި ދިރިއުޅެން ޖެހިފައިވާ މިޔަންމާގެ ރޮހިންޔާ ރެފިއުޖީންގެ މައްސަލަ ހައްލުކުރުމަށް މިޔަންމާއާ ގުޅިގެންނާއި، ބައިނަލްއަޤުވާމީ ފެންވަރުގައިވެސް މަސައްކަތް ކުރަމުން ގެންދާކަމަށް ބަންގްލަދޭޝްގެ ޚާރިޖީވަޒީރު ވިދާޅުވިއެވެ.
600،000 އަށްވުރެ ގިނަ ރޮހިންޔާ ރެފިއުޖީންގެ އިންސާނީ ބޭނުންތައް ފުއްދައިދިނުމަކީ ބަންގްލަދޭޝް ފަދަ ވަޞީލަތްތައް މަދު ޤައުމަކަށް ކެރި ކުޅަދާނެވެގެންވާ ކަމެއް ނޫންކަމަށާއި، އެ މީހުންނަށް އެހީތެރިކަން ފޯރުކޮށްދިނުމުގައި ބައިނަލްއަޤުވާމީ އެހީ އިންތިހާއަށް ބޭނުންވާކަމަށް ބަންގްލަދޭޝްގެ ޚާރިޖީ ވަޒީރު ވިދާޅުވިއެވެ.