މަސްތުވާތަކެއްޗާ ދެކޮޅަށް ފިލިޕީންސުން ކުރާ ހަނގުރާމަ އެއްވެސް ފަރާތަކަށް ނުހުއްޓުވޭނެކަމަށް އެ ޤައުމުގެ ރައީސް ރޮދްރީގޯ ޑުޓަރޓޭ ވިދާޅުވެއްޖެއެވެ.
އޭނާގެ ސަރުކާރުން މަސްތުވާތަކެއްޗާ ދެކޮޅަށް ކުރާ ހަނގުރާމަ މި ވަގުތު މަޑުޖައްސާލާފައިވާ ނަމަވެސް، މަސްތުވާތަކެތީގެ ވިޔަފާރި އިތުރުވާން ފަށައިފިނަމަ، އެކަންކުރާ ފަރާތްތަކާ ދެކޮޅަށް ހަނގުރާމަކުރަމަށް ސިފައިންނާއި ފުލުހުން އަނެއްކާވެސް ނެރޭނެކަމަށް، ފިލިޕީންސްގައި ދެއްވި ތަޤުރީރެއްގައި ޑުޓަރޓޭ ވިދާޅުވިއެވެ.
މަސްތުވާތަކެއްޗާ ދެކޮޅަށް ޑުޓަރޓޭގެ ސަރުކާރުން ކުރާ ހަނގުރާމައިގައި ތިންހާހެއްހާ މީހުން މަރާލާފައިވާކަމަށް އިންސާނީ ޙައްޤުތަކަށް މަސައްކަތްކުރާ ފަރާތްތަކުން ތުހުމަތުކުރެއެވެ.
ޑުޓަރޓޭ ވަނީ، އެ ހަނގުރާމަ ހުއްޓާލުމާ ބެހޭގޮތުން އެމެރިކާގެ ރައީސް ޑޮނަލްޑް ޓްރަމްޕާ ވާހަކަދެއްކެވުމަށްވެސް އިންކާރު ކުރައްވާފައެވެ. އަދި ޓްރަމްޕް އެދިވަޑައިގެންނެވި ކަމުގައި ވިޔަސް، މަޤުޞަދު ޙާޞިލް ނުވަނީސް މަސްތުވާތަކެއްޗާ ދެކޮޅަށް ކުރާ ހަނގުރާމަ ހުއްޓާނުލާނެކަމަށް ޑުޓަރޓޭ ވަނީ ވިދާޅުވެފައެވެ.