އެމެރިކާގައި ހުންނަ ފަލަސްތީނުގެ ޑިޕްލޮމެޓިކް އޮފީސް ބަންދުކުރުމަށް ނިންމާފައިވާ ނަމަވެސް، އެ އޮފީސް އަދިވެސް ބަންދު ނުކުރާކަމަށް އެމެރިކާ ބުނެފިއެވެ.
އެމެރިކާގެ ޚާރިޖީ ވުޒާރާގެ ތަރުޖަމާނު ހެދަރ ނުއަރޓް ވިދާޅުވީ ފަލަސްތީނުގެ އޮފީސް ބަންދުކުރުމަށް ނިންމި މައްސަލައިގައި އެމެރިކާ އާއި ފަލަސްތީނާ ދެމެދު ވާހަކަ ދެކެވެމުންދާ ކަމަށާއި އެ އޮފީހުގެ މަސައްކަތް އަދި ކުރިއަށްދާކަމަށެވެ. މި ގޮތުން ވޮޝިންޓަނުގައި ހުންނަ ފަލަސްތީނުގެ ޑިޕްލޮމެޓިކް އިދާރާ ބަންދުކުރިކަމަށް ބުނަން އަދި މާ އަވަސްކަމަށް ނުއަރޓް ވިދާޅުވިއެވެ.
އިސްރާއީލުން ފަލަސްތީނުގެ އާންމުންނާ ދެކޮޅަށް ހިންގާ ލާއިންސާނީ ޖަރީމާތަކުގެ މައްސަލަ ބައިނަލްއަޤުވާމީ ޖިނާއީ ކޯޓަށް ހުށަހަޅަން ފަލަސްތީނުން މަސައްކަތްކުރާތީ، އެމެރިކާ ވަނީ ފަލަސްތީނުގެ ޑިޕްލޮމެޓިކް އޮފީސް ބަންދުކުރާނެކަމުގެ އިންޒާރު ދީފައެވެ.
އަދި ފަލަސްތީނުގެ އޮފީސް އެމެރިކާގައި ބަހައްޓަން ބޭނުންވާނަމަ އެމެރިކާ އެދޭގޮތަށް އިސްރާއީލާއެކު ސުލްޙައިގެ ވާހަކަތައް ފަލަސްތީނުން ފަށަންޖެހޭނެކަމަށްވެސް އެމެރިކާ ބުނެއެވެ. ފަލަސްތީނުގެ ޑިޕްލޮމެޓިކް އޮފީސް ބަންދުކުރުމަށް އެމެރިކާގެ ޚާރިޖިއްޔާއިން އަންގާރަދުވަހު ނިންމުމާއެކު ރައީސް މަހްމޫދު އައްބާސް ވަނީ، ފަލަސްތީނުން އެމެރިކާއާއެކު ބާއްވާ ގުޅުންތައް މެދުކަނޑާލުމުގެ ރިޔާސީ އަމުރެއް ނެރުއްވާފައެވެ.
ފަލަސްތީނުގެ މި ނިންމުމަކީ އެމެރިކާގެ ބާރާއި ނުފޫޒު މެދުއިރުމަތީގައި ހީނަރުވެގެންދާނެކަމެއްކަމަށް ބެލެވޭތީ، ފަލަސްތީނުގެ އޮފީސް ބަންދުކުރުމުގެ ޤަރާރު ތަންފީޒުކުރަން އެމެރިކާ ވަނީ ފަސްޖެހިފައެވެ.