ޕާކިސްތާނުގެ އިސްލާމިކް ޗެރިޓީ ޖަމާއަތުގެ ލީޑަރު ޝައިޚް ޙާފިޒް ސައީދު މިނިވަންކުރުމުން އިންޑިޔާ ސަރުކާރުން އެކަން ކުށްވެރިކޮށްފިއެވެ. ޙާފިޒް ސައީދަކީ ޓެރަރިސްޓެއްކަމަށް އދން ވެސް ސިފަކޮށްފައިވާއިރު އޭނާ މިނިވަންކުރުމަކީ ބަލައިގަނެވޭނެ ކަމެއް ނޫންކަމަށް، އިންޑިޔާގެ ޚާރިޖިއްޔާގެ ތަރުޖަމާނު ރަވީޝް ކުމާރު ވިދާޅުވިއެވެ.
ހާފިޒް ސައީދަކީ ޓެރަރިސްޓް ހަމަލާތައް ދިންކަމަށް އިޢުތިރާފުވެފައިވާ ޓެރަރިސްޓެއްކަމަށްވެސް އިންޑިޔާގެ ޚާރިޖިއްޔާގެ ތަރުޖަމާނު ވިދާޅުވިއެވެ. 2008 ވަނަ އަހަރު މުމްބާއިގެ ހޮޓަލަކަށް ދިން ޓެރަރިސްޓް ހަމަލާތަކުގެ މޭސްތިރިއަކީ ޙާފިޒް ސައީދުކަމަށް އިންޑިޔާ ތުހުމަތުކުރެއެވެ. ނަމަވެސް މި ތުހުމަތުތައް ސާބިތުކޮށްދެވޭ މިންވަރަށް އިންޑިޔާއަށް ހެކި ދެއްކިފައެއް ނުވެއެވެ.
މުމްބާއިގެ ހޮޓަލަށް ދިން ހަމަލާތަކުގައި 166 މީހުން މަރުވެ އެތައް ބަޔަކު ޒަޚަމުވެފައިވެއެވެ. ޙާފިޒް ސައީދު މިނިވަންކުރީ، ލާހޫރުގެ ހައިކޯޓުން އޭނާ މިނިވަންކުރުމުގެ އަމުރެއް ނެރުމުންނެވެ. މި އަމުރު ނެރުނީ ޙާފިޒް ސައީދުގެ ބަންދުގެ މުއްދަތު އިތުރުކުރެވޭނޭ މިންވަރަށް ޕާކިސްތާނުގެ އަމަނާބެހޭ އިދާރާތަކުން ހެކި ހުށަހަޅާފައި ނުވާތީއެވެ.