ބަންގްލަދޭޝްގެ ސަރަހައްދީ ރޮނގުގެ ކައިރިއަށް ޖަމާވެފައިވާ މިޔަންމާގެ ރޮހިންޔާ ރެފިއުޖީން މިޔަންމާއަށް އަނބުރާ ފޮނުވުމުގައި ރެފިއުޖީންނާބެހޭ އދގެ އިދާރާއަށް އެއްބާރުލުން ދިނުމަށް ދެ ޤައުމުން އެއްބަސްވެފައިވާކަން ބަންގްލަދޭޝުން ހާމަކޮށްފިއެވެ.
ބަންގްލަދޭޝްގެ ޚާރިޖީ ވަޒީރު އަބުލްހަސަން މަޙްމޫދު އަލީ ވިދާޅުވީ، ރޮހިންޔާ ރެފިއުޖީންގެ އެތަށް ލައްކަ ބަޔަކު ވަރަށް ދަތިހާލުގައި ބަންގްލަދޭޝްގެ ކޮކްސް ބާޒާރު ސަރަހައްދުގައި ދިރިއުޅެމުންދާކަމަށާއި، އެހާ ގިނަ ބަޔަކު އަނބުރާ އެމީހުންގެ ވަޒަނަށް ފޮނުވުމަކީ ދަތި އުނދަނގޫ ކަމެއްކަމަށެވެ. މިކަން ކުރެވޭނީ ރެފިއުޖީންނާބެހޭ އދގެ އިދާރާ މެދުވެރިކޮށް ކަމަށާއި، އެ އިދާރާގެ ބެލުމުގެ ދަށުން ރޮހިންޔާ ރެފިއުޖީން މިޔަންމާއަށް ފޮނުމުގައި ޢަމަލުކުރަންޖެހޭ ގޮތާއި، އެކަމުގެ ޝަރުތުތަކަށް ދެ ޤައުމު މިހާރު އެއްބަސްވެފައިވާކަމަށް އޭނާ ވިދާޅުވިއެވެ.
ރިޕޯޓްތައް ބުނާގޮތުން ރޮހިންޔާ ރެފިއުޖީން އެ މީހުންގެ ވަޒަނަށް ގެންދިޔުމަށް ކުރަމުންދާ މަސައްކަތުގެ މުހިއްމުކަން މިޔަންމާއަށް ވިސްނައިދިނުމުގައި ޗައިނާ ވަނީ ފަރުދާގެ އަނެއް ފަރާތުގައި މުހިއްމު ދައުރެއް އަދާކޮށްފައެވެ.
ޗައިނާގެ ޚާރިޖީ ވަޒީރު ދާދިފަހުންވަނީ ބަންގްލަދޭޝަށާއި މިޔަންމާއަށްވެސް ރަސްމީ ޒިޔާރަތެއް ކުރައްވާފައެވެ.