ކުޑަހުވަދޫ ރަނގަޅަށް ތައްޔާރުވެއްޖެ ނަމަ ތަފާތު ދައްކާނެކަމަށް ބުނަމުން މޯހަން އަންނަ އަހަރު މާލޭގައި މަސައްކަތް ކުރަން ނިންމައިފިއެވެ.
މިއަހަރުގެ މިނިވަން ޗެމްޕިއަންޝިޕް ކުޑަހުވަދުއަށް ކާމިޔާބުކޮށްދިނުމަށްފަހު އުރީދީ ދިވެހި ޕްރިމިއަރ ލީގުގައިވެސް އެރަށު ޓީމަށް އިރުޝާދުދިން ރާއްޖޭގެ އެންމެ ތަޖުރިބާބޮޑު އެއް ކޯޗު މުޙައްމަދު ޝިޔާޒު، މޯހަން ބުނީ އަންނަ އަހަރު ދެން މާލޭން ބޭރުގައި މަސައްކަތް ނުކުރެވޭނެކަމަށެވެ. ނަމަވެސް ކުޑަހުވަދޫ ޓީމަށް ހޯދައިދެވުނު ކުރިއެރުމާމެދު ހިތްހަމަ ޖެހޭކަމަށާއި، އެޓީމުން ރަނގަޅަށް ތައްޔާރުވެގެން އަންނަ އަހަރުގެ މިނިވަން ޗެމްޕިއަންޝިޕާ ކުރިމަތިލާފިނަމަ ތަފާތު ދައްކާނެކަމަށެވެ. ލީގުގައި ކޮންމެ މެޗެއްގައިވެސް ކުޅުންތެރިންގެ ފަރާތުން ކުރިއެރުން ފެނުނު ކަމަށާއި، ހުނަރުވެރި ކުޅުންތެރިން ކުޑަހުވަދޫ ޓީމްގައި އެބަތިބިކަމަށް މޯހަން ބުންޏެވެ. މޯހަން ބުނީ މާލޭގެ ބައެއް ކްލަބްތަކުން އޭނާއާ ވާހަކަ ދައްކާ ކަމަށާއި، އަދި މާބޮޑު ކުރިއެރުމެއް ނެތް ނަމަވެސް އެފަދަ ހުށައެޅުންތަކާމެދު ވިސްނާނެކަމަށެވެ. ނަމަވެސް ޤައުމީ ޓީމުން އެއްވެސް ހުށައެޅުމެއް ނެތްކަން މޯހަން ކަށަވަރުކޮށްދިނެވެ.
" މާލޭގެ ބައެއް ކްލަބްތަކުން ވާހަކަދެއްކި. އެފަދަ މަޝްވަރާތައް ކުރާނަން. އެކަމަކު އަންނަ އަހަރު މާލޭން ބޭރުގައި މަސައްކަތް ކުރެވޭކަށް ނެތް. " މޯހަން ބުންޏެވެ.
މޯހަންއަށްފަހު އެންމެ ގިނަ ދުވަހު މާލޭން ބޭރުގައި މަސައްކަތްކުރި މާޅޮސް ޓީމްގެ ކޯޗު އަލީ ނިޝްތާރު ބުނީ ޓާގެޓްކަމަށްވާ ދިހަ ޕޮއިންޓާ ހަމައަށް ވާޞިލް ނުވެވުމުން އެންމެ ހިތްހަމަ ނުޖެހުނަސް، ފަހު ވަގުތާ ހަމައަށްވެސް ކުޅުންތެރިން ހިތްވަރުކުރިކަމަށެވެ. އަދި ފުރަތަމަ ޑިވިޝަންގައި ކޯޗެއްގެ ގޮތުގައި ކުރެވުނު ތަޖުރިބާއަކީ ރަނގަޅު ތަޖުރިބާއެއްކަމަށެވެ. ފުރުޞަތު ލިބިއްޖެ ނަމަ އަންނަ އަހަރުވެސް މަސައްކަތްކުރަން ތައްޔާރަށް ހުރިކަމުގެ އިޝާރާތެއް އޭނާ ކުރިއެވެ.
" އެކަން ނިންމާނީ މެނޭޖްމަންޓުން. ވަރަށް ރަނގަޅު ތަޖުރިބާއެއް މިއީ ފުރަތަމަ ޑިވިޝަންގައި ލިބުނު ފުރަތަމަ ފުރުޞަތަކީ " މާޅޮހުގައި ހުރެ އެޓީމް ތަމްރީންކުރ ނިޝްތާރު ބުންޏެވެ.