އެމެރިކާގެ ޚާރިޖީ ވަޒީރު ރެކްސް ޓިލަރސަން މަޤާމުން ދުރުކޮށް އެ މަޤާމަށް ސީއައިއޭގެ ޑިރެކްޓަރ މައިކް ޕޮމްޕިއޯ އައްޔަންކުރަން ރައީސް ޑޮނަލްޑް ޓްރަމްޕް މަސައްކަތްކުރައްވާކަމަށް ފެތުރުނު ޚަބަރުތައް ޓްރަމްޕް ދޮގުކުރައްވައިފިއެވެ.
ހުކުރުދުވަހު ކުރެއްވި ޓްވީޓެއްގައި ޓްރަމްޕް ވިދާޅުވީ، ޚާރިޖީ ދާއިރާގެ ބައެއް ކަންކަމުގައި އޭނާ އާއި ޓިލަރސަންގެ ޚިޔާލު ތަފާތު ނަމަވެސް ޓިލަރސަން އެމެރިކާގެ ޚާރިޖީ ވަޒީރުކަމުގެ މަޤާމުގައި ދެމިހުންނަވާނެކަމަށެވެ. އަދި ޚިޔާލު ތަފާތުވާ ހާލަތްތަކުގައި ފަހުބަސް އޮންނާނީ އޭނާއަށް ކަމަށާއި އެހެންކަމުން ޓިލަރސަން މަޤާމުން ދުރުކުރުމުގެ ވިސްނުން ނުގެންގުޅުއްވާ ކަމަށްވެސް ޓްރަމްޕް ވިދާޅުވިއެވެ. ޓިލަރސަންވެސް ވަނީ އޭނާ މަޤާމުން ވަކިކުރަން ޓްރަމްޕް މަސައްކަތްކުރައްވާ ކަމަށް ފެތުރުނު ޚަބަރުތައް ދޮގުކުރައްވާފައެވެ.
އެމެރިކާގެ ޚާރިޖީ ވުޒާރާގެ ތަރުޖަމާން ހެދަރ ނުއަރޓް ބުރާސްފަތި ދުވަހު ވިދާޅުވެފައިވަނީ، އެމެރިކާގެ ޑިޕްލޮމަސީގެ އިސްވެރިއެއްގެ ހައިސިއްޔަތުން ޚާރިޖީ ވަޒީރުކަމުގެ މަޤާމު އަދާކުރެއްވުމުގައި ޓިލަރސަން ދެމިހުންނަވާނެ ކަމަށާއި، ޓިލަރސަން މަޤާމުން ދުރުކުރާކަމުގެ ޚަބަރުތަކަކީ ދޮގު ޚަބަރުތަކެއް ކަމަށެވެ.
މީގެއިތުރުން އެމެރިކާގެ ދިފާޢީ ވަޒީރު ޖޭމްސް މަޓިސްވެސް ވަނީ ޓިލަރސަން މަޤާމުގައި ދެމިހުންނަވާނެ ކަމަށް ވިދާޅުވެ ވާހަކަ ދައްކަވާފައެވެ. ޢުމުރުން ފަސްދޮޅަސް ފަސްއަހަރުގެ ޓިލަރސަން އަކީ އެމެރިކާގެ ބޮޑު ކުންފުންޏެއްކަމަށްވާ އެކްސޯން މޯބައިލްގެ ޗީފް އެގްޒެކެޓިވްކަމުގެ މަޤާމުގައި ގިނަ ދުވަސްތަކެއް ވަންދެން ހުންނެވި ބޭފުޅެކެވެ.