ސްރީލަންކާގެ ކައިރީގައި އުފެދިފައިވާ ތޫފާން އޯޗީގެ ސަބަބުން އިންޑިޔާއަށާއި ސްރީލަންކާއަށް ބޮޑެތި ގެއްލުންތަކެއް ލިބެމުންއެބަދެއެވެ.
އޮޗީގެ ސަބަބުން އިންޑިޔާގައި ދިހަ މީހުން މަރުވެ، މަހަށް ނިކުތް ސަތޭކައަށްވުރެ ގިނަ މަސްވެރިން ގެއްލިފައިވާއިރު ސްރީލަންކާގައިވަނީ ހަތްމީހުން މަރުވެ ތޭވީސް މީހަކު ގެއްލިފައެވެ. ތޫފާން އޮޗީގެ ވައި އިންޑިޔާގެ ބައެއް ޖަޒީރާތަކާއި ކެރެލާގެ ބައެއް ސަރަހައްދުތަކަށް ޖެހިފައިވަނީ ގަޑިއަކު ހަތްދިހަ ކިލޯމިޓަރާއި ސަތޭކަ ތިރީސް ކިލޯމީޓަރުގެ ބާރުމިނުގައިކަމަށް އިންޑިޔާގެ މޫސުމާބެހޭ ޤައުމީ އިދާރާއިން ބުނެއެވެ.
ތޫފާން އޮޗީ ދަތުރުކުރަމުން ދަނީ އިންޑިޔާގެ ޔުނިޔަން ޓެރަޓަރީގައި ހިމެނޭ ލެކެޑިވް ޖަޒީރާތަކުގައި ހިމެނޭ ބައެއް ޖަޒީރާތަކުގެ މަތިން ކަމުން ލެކެޑިވްސްގެ ބައެއް ޖަޒީރާތަކަށް ބޮޑެތި ގެއްލުންލިބި، ފެންބޮޑުވެ، ކަރަންޓާއި މުވާސަލާތީ ގުޅުން ކެނޑި، ރުށް ގަސް ވަނީ މުލުން ލުހެލާފައެވެ.
މި ތޫފާނުގެ ސަބަބުން ސްރީލަންކާގައި ވަނީ ވިހިހާހަށް ވުރެ ގިނަ މީހުން ހާލުގައި ޖެހިފައެވެ. ހާލުގައި ޖެހުނު މީހުންނަށް އެހީވުމަށްޓަކައި ރައީސް މައިތުރިޕާލާ ސިރިސޭނާގެ އަމުރުފުޅަށް ސްރީލަންކާ ސިފައިންގެ ދެހާހަށްވުރެ ގިނަ މީހުންނާއި އެ ޤައުމުގެ ޑިޒާސްޓަރ މެނޭޖްމަންޓްގެ މުވައްޒަފުން ދަނީ ހަރަކާތްތެރިވަމުންނެވެ.