ޓެލްއަވީވުގައި ހުންނަ އެމެރިކާގެ އެންބަސީ ގުދްސަށް ބަދަލުކުރުމަށާއި ގުދްސަކީ އިސްރާއީލުގެ ވެރިރަށްކަމުގައި އިޢުތިރާފް ވުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމެވި ނިންމާބެހޭގޮތުން މަޝްވަރާކުރުމަށް އދގެ ސަލާމަތީ މަޖިލީހުގެ ކުއްލި ޖަލްސާއެއް ބާއްވަން ނިންމައިފިއެވެ.
ލެޓިން އެމެރިކާގެ ޤައުމެއްކަމަށްވާ ބޮލީވިޔާ އިސްކޮށް އޮވެގެން އިތުރު އަށް ޤައުމެއްގެ އެހީތެރިކަމާއެކު ބާއްވާ މި ޖަލްސާގެ ބޭނުމަކީ ޓްރަމްޕްގެ ނިންމުން އަނބުރާ ގެންދިޔުމަށް އެމެރިކާއަށް ގޮވާލުން ކަމަށާއި ނަމަވެސް މިކަމާބެހޭގޮތުން ޤަރާރެއް ފާސްކުރާނަމަ އެކަމާދެކޮޅަށް އެމެރިކާ ވީޓޯގެ ބޭނުންކުރާނެ ކަމަށް އދގެ ޑިޕްލޮމެޓިކް ދާއިރާތަކުން ބުނެއެވެ.
ޓްރަމްޕްގެ ނިންމާބެހޭގޮތުން މަޝްވަރާކުރުމަށް ބާއްވާ ސަލާމަތީ މަޖިލީހުގެ ކުއްލި ޖަލްސާ އޮންނާނީ ހުކުރުދުވަހުގެ ވަގުތެއްގައި. މިކަމާބެހޭގޮތުން މަޢުލޫމާތު ދެއްވަމުން އދގައި ހުންނަވާ ބޮލީވިޔާގެ ދާއިމީ މަންދޫބު ސާޝާ ސުލޭޒް ވިދާޅުވީ، ޓްރަމްޕްގެ ނިންމުމަކީ ބައިނަލްއަޤުވާމީ ގާނޫނުތަކާއި އދގެ ޤަރާރުތަކާ ޚިލާފު ނިންމުމެއްކަމުން އެ ނިންމުމާ ދެކޮޅަށް ސަލާމަތީ މަޖިލީހުގައި މަޝްވަރާ ކުރެވޭނެކަމަށެވެ.
މީގެއިތުރުން ޓްރަމްޕްގެ ނިންމުމަކީ ބައިނަލްއަޤުވާމީ އަމަނާއި ސުލްޙައަށް ނުރައްކާވާފަދަ ނިންމުމެއް ކަމަށްވާތީ މިއީވެސް މިމައްސަލަ ސަލާމަތީ މަޖިލީހަށް ގެންދަންޖެހޭ ސަބަބެއްކަން ބޮލީވިޔާގެ ދާއިމީ މަންދޫބު ފާހަގަކުރެއްވިއެވެ.
ބޮލީވިޔާ އިސްކޮށް އޮވެގެން ސަލާމަތީ މަޖިލީހުގެ ކުއްލި ބައްދަލުވުމަކަށް ގޮވާލާފައިވަނީ އެމަޖިލީހުގައި ހިމެނޭ މިސްރު، ފަރަންސޭސިވިލާތް، އިޓަލީވިލާތް، ސްވިޑްން، އިނގިރޭސިވިލާތް، ސެނެގޯލް، އަދި އުރުގުއާއީންނެވެ.
މި ގައުމުތަކުގެ ދާއިމީ މަންދޫބުންވަނީ ސަލާމަތީ މަޖިލީހުގެ މިދައުރުގެ ރައީސް ޖަޕާންގެ މަންދޫބުގެ އަރިހުންނާއި އދގެ ސެކްރެޓަރީ ޖެނެރަލް އެންޓޯނިޔޯ ގުޓޭރޭޝްގެ އަރިހުން އެ މަޖިލީހުގެ ކުއްލި ބައްދަލުވުމެއް ބާއްވައިދިނުމަށް ބުރާސްފަތި ދުވަހު ރަސްމީކޮށް އެދިފައެވެ.
މި އަށް ޤައުމުގެ ތެރޭގައި ރަޝިޔާ އާއި ޗައިނާ ނުހިމެނު ކަމުގައިވިޔަސް، އެ ދެ ޤައުމުވެސް އޮތީ ޓްރަމްޕްގެ ނިންމުމާމެދު މަޝްވަރާކުރަން ތައްޔާރަށް ކަމަށާއި ސަލާމަތީ މަޖިލީހުގެ ކުއްލި ޖަލްސާ ބޭއްވުމަށް އެ ދެ ޤައުމުގެ އެއްބާރުލުން ލިބޭނެކަމަށް ޚަބަރުތައް ބުނެއެވެ.
ޓްރަމްޕްގެ ނިންމުމާ ދެކޮޅަށް ފަލަސްތީނުގެ ރައްޔިތުން ގެންދަނީ އަޑުއުފުލައި އިޙްތިޖާޖު ކުރަމުންނެވެ.
ޓްރަމްޕްގެ ޣައިރު ގާނޫނީ ނިންމުމާ ކުރިމަތިލުމަށްޓަކައި ފަލަސްތީނުގެ ޖަމާއަތްތަކުގެ މެދުގައިވާ ދެބަސްވުންތަކާއި ޚިޔާލު ތަފާތުވުންތައް ނައްތާލައި ފަލަސްތީނުގެ އެތެރޭގެ ސަފުތައް ވަރުގަދަކޮށް އެއްބައިވަންތަކަން ގާއިމް ކުރުމަށް މަސައްކަތް ކުރަމުން ގެންދާކަން ފަލަސްތީނުގެ ބޮޑުވަޒީރު ރާމީ ހަމްދު ﷲ ވަނީ ހާމަކުރައްވާފައެވެ.
އަދި ފަލަސްތީނުގެ މިނިވަންކަމަށް މަސައްކަތްކުރާ ޖަމާއަތްތަކުންވަނީ އިސްރާއީލުގެ އަނިޔާވެރިކަމާ ދެކޮޅަށް ފަލަސްތީނުގެ ރައްޔިތުން އިންތިފާޟާއެއް ފަށާނެކަމުގެ އިންޒާރުވެސް ދީފައެވެ.