ޤުދުސާ ބެހޭގޮތުން އެމެރިކާގެ ރައީސް ޑޮނަލްޑް ޓްރަމްޕް ނިންމެވި ޣައިރު ޤާނޫނީ ނިންމެވުމާ ދެކޮޅަށް ދުނިޔޭގެ އެކި ކަންކޮޅުތަކުގައި އެތައް މިލިޔަން ބަޔަކު މުޒާހަރާކޮށް، ޓްރަމްޕްގެ ނިންމުން ކުށްވެރިކުރަމުން އެބަދެއެވެ.
ފަލަސްތީނާއި ޢަރަބި އިސްލާމީ ޤައުމުތަކުގެ އިތުރުން އޭޝިޔާ، ޔޫރަޕް، އެފްރިކާ އަދި ލެޓިން އެމެރިކާގެ އެތައް ޤައުމުމެއްގައި ހުކުރުދުވަހު ޤުދުސްގެ ދިފާޢުގައި މުޒާހަރާކޮށް އެމެރިކާ އާއި އިސްރާއީލު ކުށްވެރިކޮށްފައިވެއެވެ.
މި ޤައުމުތަކުގެ ތެރޭގައި ތުރުކީވިލާތް، މެލޭޝިޔާ، އިންޑޮނީޝިޔާ، އީރާން، ޕާކިސްތާން، އަފްޣާނިސްތާން، އިރާޤު، މިސްރު، އުރުދުން، ޔަމަން، ލީބިޔާ، ލުބްނާން، ތޫނިސް އަދި އަލްޖަޒާއިރު ފަދަ އެތައް އިސްލާމީ ޤައުމެއް ހިމެނެއެވެ.
ޔޫރަޕަށް ބަލާއިރު އިނގިރޭސިވިލާތާއި ފަރަންސޭސިވިލާތާއި ޖަރުމަނުވިލާތާއި އެނޫންވެސް އެތައް ޤައުމެއްގައި އެތަށް ސަތޭކަ ހާސް މީހުން ޓްރަމްޕްގެ ނިންމުމާ ދެކޮޅަށް ވަނީ މުޒާހަރާކޮށްފައެވެ.
ޓްރަމްޕްގެ ނިންމެވުމާ ދެކޮޅަށް މުޒާހަރާކުރި ޤައުމުތަކުގެ ތެރޭގައި ޚުދު އެމެރިކާވެސް ހިމެނެއެވެ. މުޒާހަރާކުރި މީހުންވަނީ ޤުދުސާ ބެހޭގޮތުން ޓްރަމްޕް ނިންމެވި ނިންމެވުން ބަދަލުކުރުމަށް ގޮވާލާފައެވެ. ހުކުރު ދުވަހުގެ ހުކުރު ނަމާދަށްފަހު ފަލަސްތީނުގައި ކުރި މުޒާހަރާތަކާ ދެކޮޅަށް އިސްރާއީލު ބާރުގެ ބޭނުންކުރުމުން ފަލަސްތީނުގެ ދެ މީހުން ޝަހީދުވެ ދުއިސައްތަ ފަންސާހަށްވުރެ ގިނަމީހުންވަނީ ޒަޚަމްވެފައެވެ.
ފަލަސްތީނުގެ ޖަމާއަތްތަކުންވަނީ ޤުދުސްގެ ދިފާޢުގައި ވަރުގަދަ އިންތިފާޟާއެއް ފެށުމަށް ފަލަސްތީން ރައްޔިތުންނަށް ގޮވާލާފައެވެ.