ނޮވެމްބަރު މަހުގެ 29 ވަނަ ދުވަހު އުތުރު ކޮރެއާއިން ޓެސްޓްކުރި ބެލެސްޓިކް މިސައިލުގެ މައްސަލައިގައި އެ ޤައުމާ ދެކޮޅަށް ދަތިކުރުމުގެ ވަރުގަދަ ފިޔަވަޅުތަކެއް އެޅުމަށް އދގެ ސަލާމަތީ މަޖިލީހުން ނިންމައިފިއެވެ. މި ފިޔަވަޅުތައް އެޅުމަށް ގޮވާލާ ޤަރާރު ސަލާމަތީ މަޖިލީހުން ފާސްކޮށްފައިވަނީ، މަޖިލީހުގައި ހިމެނޭ 15 ޤައުމުގެ ފުރިހަމަ އަޣުލަބިއްޔަތުންނެވެ.
އެމެރިކާއިން އިސްނަގައިގެން ސަލާމަތީ މަޖިލީހަށް ހުށަހެޅި މި ޤަރާރުގައި ވަނީ، އުތުރު ކޮރެއާއަށް އަހަރަކު އެތެރެ ކުރާ ސާފުކުރި ތެލުގެ މިންވަރު، 90 އިންސައްތައިން މަދުކުރުމަށް ގޮވާލާފައެވެ. މި ޤަރާރުގައި ބުނަނީ އެ ޤައުމަށް އަހަރަކު އެތެރެ ކުރެވޭނީ 500،000 ފީފާގެ ސާފު ކުރި ތެޔޮ ކަމަށާއި، އެ ޤައުމަށް އެތެރެ ކުރާ ސާފުނުކުރާ ތެލުގެ މިންވަރުވެސް އަހަރަކު 4000،000 ފީފާއަށް މަދުކުރާނެ ކަމަށެވެ.
މި ޤަރާރުގައި ބުނެފައިވަނީ އުތުރު ކޮރެއާއިން އިތުރު ނިއުކްލިޔަރ ޓެސްޓެއް ނުވަތަ އިތުރު ދުރުރާސްތާ މިސައިލެއް ޓެސްޓްކޮށްފިނަމަ އެ ޤައުމާ ދެކޮޅަށް މިފަދަ އިތުރު ފިޔަވަޅުތައް އެޅުމުގެ ބާރު އދގެ ސަލާމަތީ މަޖިލީހަށް ލިބިގެންވާކަމަށެވެ. މީގެ އިތުރުން ޤައުމުން ބޭރުގައި މަސައްކަތްކުރަމުންދާ އުތުރު ކޮރެއާގެ ރައްޔިތުން، ކުރިއަށް އޮތް 24 މަސް ދުވަހުގެ ތެރޭގައި ޤައުމަށް އެނބުރި ދިއުމަށްވެސް މި ޤަރާރު ގޮވާލައެވެ.
މި ޤަރާރު ފާސްކުރަން ބޭއްވި މަޖިލީހަށްފަހު ނޫސްވެރިންނާ ވާހަކަދައްކަވަމުން އެމެރިކާއިން އދއަށް ކަނޑައަޅާފައި ހުންނަ ސަފީރު ނިކީ ހޭލީ ވިދާޅުވީ، އުތުރު ކޮރެއާއިން އަނެއްކާވެސް އދގެ ޤަރާރުތަކާ ދެކޮޅަށް ފިޔަވަޅު އަޅާނަމަ އެ ޤައުމަށް، އަދަބު ލިބޭނެކަން ހުކުރު ދުވަހު ފާސްކުރި ޤަރާރުން ސާބިތުވެއްޖެ ކަމަށެވެ.
ހުކުރު ދުވަހު އދގެ ސަލާމަތީ މަޖިލީހުން އުތުރު ކޮރެއާއާ ދެކޮޅަށް ފާސްކުރި މި ޤަރާރާއެކު، 2006 ވަނަ އަހަރަށް ފަހު އުތުރު ކޮރެއާގެ ނިއުކްލިޔަރ އަދި މިސައިލް ޕްރޮގްރާމްގެ މައްސަލައިގައި އދގެ ސަލާމަތީ މަޖިލީހުން އެ ޤައުމާ ދެކޮޅަށް ފާސްކުރި ޤަރާރުތަކުގެ ޢަދަދު މިވަނީ 10ށް އަރާފައެވެ.