1967ގެ ހަނގުރާމައިގައި އިސްރާއީލު ގަދަބާރުން ހިފާފައިވާ ފަލަސްތީނުގެ ބިންތަކުގެ ތެރޭގައި ހިމެނޭ ހުޅަނގު އައްސޭރި އާއި އިރުމަތީ ޤުދުސަކީ އިސްރާއީލުގެ ބިންތަކެއް ކަމަށް ހެދުމަށް އެ ޤައުމުގައި ވެރިކަން ކުރާ ހަރުކަށި ލިކޫޑް ޕާޓީން މަސައްކަތް ފަށައިފިއެވެ.
އިސްރާއީލުގެ ހަރުކަށި ބޮޑުވަޒީރު ބެންޖަމިން ނަތަންޔާހޫގެ ޕާޓީ ކަމަށްވާ ލިކޫޑް ޕާޓީން ބުނީ، ހުޅަނގު އައްސޭރީ އާއި އިރުމަތީ ޤުދުސަކީ އިސްރާއީލުގެ ބިންތަކެއްކަމަށް ހަދަންޖެހޭ ކަމަށާއި މިކަމާ ބެހޭގޮތުން އެ ޕާޓީގެ ކައުންސިލް މެންބަރުންގެ މެދުގައި ވޯޓެއް ނެގުމަށް ނިންމާފައިވާކަމަށެވެ. އަންނަ ހަފުތާގެ އާދީއްތަ ދުވަހު ބާއްވާ އެ ޕާޓީގެ ބައްދަލުވުމުގައި މި ވޯޓު ނަގާނެކަމަށްވެސް ލިކޫޑް ޕާޓީން ބުނެއެވެ.
އިރުމަތީ ޤުދުސް ހިމެނޭގޮތަށް މުޅި ޤުދުސަކީ އިސްރާއީލުގެ ވެރިރަށްކަމަށް 1984 ވަނަ އަހަރު އިސްރާއީލުގެ އޭރުގެ ސަރުކާރުންވަނީ ނިންމާފައެވެ. އެހެންނަމަވެސް ހުޅަނގު އައްސޭރީގެ އެހެން ބިންތަކަކީ އިސްރާއީލުގެ ބިންތަކެއްކަމަށް ނިންމާފައެއް ނުވެއެވެ.
މި ފަހަރު އިސްރާއީލުން މަސައްކަތް މި ކުރަނީ އިރުމަތީ ޤުދުސް ހިމެނޭގޮތަށް ހުޅަނގު އައްސޭރީގެ ހުރިހާ ބިންތަކަކީވެސް އިސްރާއީލުގެ ބިންތަކެއްކަމަށް ހެދުމަށް ކަމަށް ލިކޫދް ޕާޓީން ބުނެއެވެ.