ރަޝިޔާގެ ރައީސް ވްލަޑްމީރް ޕުޓިން ރިޔާސީ އައު ދައުރަކަށް ކުރިމަތިލެއްވުމުން އެކަން ބަލައިގަތްކަން އެ ޤައުމުގެ އިންތިޚާބުތަކާބެހޭ މަރުކަޒީ ކޮމިޓީން ހާމަކޮށްފިއެވެ.
އެ ކޮމިޓީން ބުނީ ދެހާސް އަށާރަވަނަ އަހަރު ބާއްވާ ރިޔާސީ އިންތިޚާބަށް ޕުޓިން ކުރިމަތިލައްވައިފި ކަމަށާއި ފޯމްތައް ޗެކްކުރުމަށްފަހު ކެންޑިޑެންސީ ބަލައިގެންފައިވާކަމަށެވެ.
ޕުޓިން މީގެކުރިން ވަނީ ދެ ދައުރެއްގައި ރަޝިޔާގެ ރައިސްކަން ކުރައްވާފައެވެ. އެއަށްފަހު އެއް ދައުރުގައި ރަޝިޔާގެ ބޮޑުވަޒީރުކަން ކުރެއްވުމަށްފަހު ޕުޓިންވަނީ ރިޔާސީ ދެވަނަ ދައުރެއް ފައްޓަވާފައެވެ. މި ދައުރު ނިމޭނީ 2018 ވަނަ އަހަރުގެ މާރިޗް މަހުގެ ތެރޭގައެވެ.
ރަޝިޔާގެ އިންތިޚާބުތަކާބެހޭ މަރުކަޒީ ކޮމިޓީއިން ވަނީ އެ ޤައުމުގެ އިދިކޮޅު ލީޑަރެއްކަމަށްވާ އެލެކްސީ ނެވެލްނީގެ ކެންޑިޑެންސީ ބަލައިނުގަތުމަށް ނިންމާފައެވެ. މިގޮތަށް ނިންމީ ކޮރަޕްޝަނުގެ މައްސަލައިގައި އޭނާގެ މައްޗަށް ކުރިން އައިސްފައިވާ ހުކުމެއްގެ ސަބަބުން ރިޔާސީ އިންތިޚާބަށް ކުރުމަތިލުމުގެ ޝަރުޠުތައް އޭނާގެ ކިބާގައި ނެތުމުންކަމަށް ރަޝިޔާގެ އިންތިޚާބުތަކާބެހޭ މަރުކަޒީ ކޮމިޓީން ބުނެއެވެ.