އައިއެސްގެ ކުރީގެ ހަނގުރާމަވެރިންނަށް އެމެރިކާއިން އަސްކަރީ ތަމްރީން ދެމުން ގެންދާކަމަށް ރަޝިޔާއިން ތުހުމަތުކޮށްފިއެވެ.
ރަޝިޔާގެ ސިފައިންގެ ޗީފް އޮފް ސްޓާފް، ޖެނެރަލް ވެލަރީ ގްރަސިމޯފް ވިދާޅުވީ، ސޫރިޔާގެ ހަނގުރާމަ ނިމުމަކަށް އަޔަނުދިނުމަށް އެމެރިކާއިން ވަރަށް ބޮޑަށް މަސައްކަތްކުރަމުން ގެންދާކަމަށާއި، މި މަސައްކަތުގެ ތެރޭގައި އައިއެސްގައި ކުރިން ހަރަކާތްތެރިވި ޓެރަރިސްޓުންނަށް ތަމްރީންދީގެން އެމީހުން އަލުން އަނބުރާ ސޫރިޔާގެ ހަނގުރާމައަށް ނެރުން ހިމެނޭކަމަށެވެ.
މިކަމުގެ ބޭނުމަކީ ސޫރިޔާގައި ހަމަނުޖެހުން އުފެއްދައިގެން ހަނގުރާމަ ދިގުދެންމުން ކަމަށްވެސް ރަޝިޔާގެ ސިފައިންގެ ޗީފް އޮފް ސްޓާފް ވިދާޅުވިއެވެ. ރަޝިޔާގެ ޚާރިޖީ ވަޒީރު ސަރްގެއި ލަވްރޯފް ވަނީ ސޫރިޔާ ސަރުކާރުގެ ހުއްދައަކާނުލައި އެމެރިކާ ސިފައިން ސޫރިޔާގައި ތިބޭ މައްސަލަ ކުށްވެރި ކުރައްވައި ވާހަކަ ދައްކަވާފައެވެ.
މިގޮތުން ސޫރިޔާގައި އައިއެސް ޖަމާއަތް ބަލިވެފައިވާއިރު ޓެރަރިޒަމާ ހަނގުރާމަކުރުމުގެ ނަމުގައި ސޫރިޔާގައި އެމެރިކާ ސިފައިން ބޭތިއްބުމުގެ ބޭނުމާމެދު ލަވްރޯފް ވަނީ ސުވާލު އުފައްދަވާފައެވެ.
އެމެރިކާއިންވަނީ ސޫރިޔާއިން ފޭބުމުގެ ވިސްނުން އަދި ނުގެންގުޅޭ ކަމަށް ބުނެފައެވެ. ސޫރިޔާ ސަރުކާރުންވަނީ އެ ޤައުމުން ފޭބުމަށް އެމެރިކާއަށް ގޮވާލާފައެވެ.