ފަލަސްތީނަށް އެމެރިކާއިންދޭ އެހީ ކަނޑާލިނަމަވެސް ފަރުވާލެއްނެތް ކަމަށާއި، ފަލަސްތީނުގެ ބިންތަކާއި ޙައްޤުތަކުގެ އަގު އެއަށްވުރެ މާ ބޮޑުކަމަށާއި، ޤުދުސަކީ ވިއްކާ ބިމެއް ނޫންކަމަށް ފަލަސްތީނުން ބުނެފިއެވެ.
ފަލަސްތީނުގެ ރިޔާސީ ތަރުޖަމާން ނަބީލް އަބޫރުދައިނާ ވިދާޅުވީ، ޤުދުސަކީ ފަލަސްތީނުގެ ދަޢުލަތުގެ ވެރިރަށް ކަމަށާއި، އެއީ ޑޮލަރަށް ނޫނީ ރަނަށް ވިއްކާ ބިމެއްކަމަށް އެމެރިކާގެ ރައީސް ޑޮނަލްޑް ޓްރަމްޕް ދެކެވަޑައިގަންނަވާނަމަ، އެއީ ކުށްހީއެއް ކަމަށެވެ.
ފަލަސްތީނުން އެމެރިކާއަށް ގޮންޖަހައި ވާހަކަދައްކާފައިމިވަނީ ފަލަސްތީނަށް އެމެރިކާ ދޭ އެހީ ހުއްޓާލަން ޖެހިދާނެކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވުމާ ގުޅިގެންނެވެ.
ޓްރަމްޕް ކުރެއްވި ޓްވީޓެއްގައި ވިދާޅުވީ އެމެރިކާއިން ފަލަސްތީނަށް ބޮޑެތި އެހީތަކެއްވަމުންދާއިރު އޭގެބަދަލުގައި ފަލަސްތީނުން އެމެރިކާއަށް އެއްވެސް އެއްޗެއް ނުދޭކަމަށެވެ.
އަދި ފަލަސްތީނުން އެމެރިކާއަށް އިހްތިރާމެއް އަދި ހެޔޮ ބަހެއްހާ މިންވަރުވެސް ނުދޭއިރު، ފަލަސްތީނުން ސުލްޙައާ ދުރަށްދިޔުމަކީވެސް ފަލަސްތީނަށް ދޭ އެހީ ކަނޑާލަންޖެހޭ ސަބަބެއްކަން ޓްރަމްޕް ވިދާޅުވިއެވެ.
ޤުދުސަކީ އިސްރާއީލުގެ ވެރިރަށްކަމަށް އިސްރާއީލު ނިންމާފައިވާ ބާޠިލު ނިންމުން އެމެރިކާއިން ބަލައިގަތުމާއެކު ޓެލްއަވީވްގައި ހުންނަ އެމެރިކާގެ އެންބަސީ ޤުދުސަށް ބަދަލުކުރުމަށް ޓްރަމްޕް ނިންމެވުމާ ގުޅިގެން ފަލަސްތީނުންވަނީ އެމެރިކާ އިސްވެއޮވެގެން ކުރިޔަށްގެންދާ ސުލްހައިގެ ވާހަކަތަކުގައި ދެން ބައިވެރިނުވާނެކަމަށް ބުނެފައެވެ.
އަދި އެމެރިކާއަކީ އިސްރާއީލުގެ ކޮޅަށްޖެހި ހުސްވެފައިވާ ޤައުމަކަށްވާތީ އެމެރިކާއަކީ ފަލަސްތީނާއި އިސްރާއީލާ ދެމެދު ސުލްހަ ޤާއިމުކުރުމަށް ކުރާ މަސައްކަތުގައި މެދުވެރިއެއްގެ ދައުރު އަދާކުރުމަށް ތަސައްރަފު ފުދޭ ޤައުމެއް ނޫންކަމަށްވެސް ފަލަސްތީނުގެ ރައީސް މަހްމޫދު އައްބާސް ވަނީ ވިދާޅުވެފައެވެ.
މިކަމާ ކޯފާވެ، ފަލަސްތީނަށް އެމެރިކާއިން ދޭ އެހީ ކަނޑާލާނެކަމުގެ އިންޒާރު ޓްރަމްޕް ދެއްވުމުން ފަލަސްތީނުގެ ލީޑަރުންވަނީ އެމެރިކާއާ ނުލައި ފަލަސްތީނުގެ ރައްޔިތުންނަށް އުޅެވޭނެކަމަށާއި، އެމެރިކާގެ އެހީއަށްވުރެ ފަލަސްތީނުގެ ބިންތަކާއި ފަލަސްތީނުގެ ޙައްޤުތަކުގެ އަގު މާބޮޑުކަމަށް ވިދާޅުވެ ޓްރަމްޕަށް ފާޅުގައި ގޮންޖައްސަވާފައެވެ.