މިއަހަރުވެސް ޔުނައިޓެޑް ވިކްޓްރީ ކޯޗު މުޙައްމަދު ނަޒީހުއާ ހަވާލުކުރަން އެކްލަބުން ނިންމައިފިއެވެ.
ކުޅުންތެރިން ހީދުމުގެ މަސައްކަތް ކުރަމުންދާ ޓީމުން ބުނީ ނަޒީހުއާ ޓީމް ހަވާލުކުރަން ނިންމާ، ކުޅުންތެރިން ހޯދަމުންދަނީވެސް ކޯޗުގެ މަޝްވަރާގެ މަތީންކަމަށެވެ. އެގޮތުން މިދިޔަ އަހަރު ޓީމަށް ކުޅުނު ކުޅުންތެރިންގެ ތެރެއިން ކޯޗު ބޭނުންވާ ހަ ކުޅުންތެރިއަކާ އެކު އާއެއްބަސްވުމެއް ހެދިފައިވާކަމަށް ކްލަބުން ބުނެއެވެ. އިތުރު ކުޅުންތެރިންނާވެސް މަޝްވަރާ ކުރަމުންދާ ކަމަށާއި ކުރިއަށް މިއޮތް ދެދުވަސް ތެރޭގައިވެސް ދެ ކުޅުންތެރިއަކު ޓީމާ ގުޅޭނެކަމަށް ޔުނައިޓެޑް ވިކްޓްރީން ބުންޏެވެ.
ބިދޭސީ ހަތަރު ކުޅުންތެރިން ގެންނަންވެސް ކްލަބުން ވަނީ ނިންމާފައެވެ. އޭގެ ތެރެއިން އެއް ކުޅުންތެރިއަކީ ނިއުއާއި ޓީސީގެ އިތުރުންވެސް ޔުނައިޓެޑް ވިކްޓްރީއަށްވެސް ކުރިން ކުޅުނު ބްރެޒިލްގެ ފޯވާޑް ރަފީނިއާއެވެ. އިތުރުން ތިން ކުޅުންތެރިންނަށްވެސް މިހާރު އެއްބަސްވުން ފޮނުވާފައިވާކަމަށް ކްލަބުން މައުލޫމާތުދިނެވެ. މިދިޔަ ސީޒަންގައި ކޯޗު މުޙައްމަދު ނަޒީހު ޓީމާ ހަވާލުވީ މުޙައްމަދު އާތިފް ކޯޗުކަމުން އިސްތިއުފާ ދިނުމުންނެވެ. އޭރު ނަޒީހު ބުނީ ޓީމަށް ކުރިއެރުން ހޯދައިދީ ނަތީޖާ ނެރެދެވޭނީ ޓީމް ބައްޓަންކުރަން ވަގުތު ލިބި، ރަނގަޅު ޓީމެއްވެސް އޮވެގެންކަމަށެވެ.
މިދިޔަ އަހަރު މާލޭ ލީގުގައި ޔުނައިޓެޑް ވިކްޓްރީ މޮޅުވީ އެއް މެޗުންނެވެ. ޔުނައިޓެޑް ވިކްޓްރީ ވަނީ 2016 ވަނަ އަހަރު ފުރަތަމަ ޑިވިޝަންގައި ވާދަކުރި ފުރަތަމަ އަހަރު ރަނގަޅު ނަތީޖާތަކެއް ހޯދާ، ގަދަ ހަތަރު ޓީމްގެ ތެރޭގައިވެސް ހިމެނިފައެވެ.