އުރުދުންގެ ކަންކޮޅުތަކުގައި ޓެރަރިސްޓް ޙަމަލާތައް ދިނުމަށް ރާވާފައިވާ ރޭވުންތަކެއް ނާކާމިޔާބުކޮށްލިކަން އެ ޤައުމުން ހާމަކޮށްފިއެވެ.
އުރުދުންގެ އަމަނާބެހޭ ފަރާތްތަކާ ހަވާލާދީ އެ ޤައުމުގެ "ބަތުރާ" ނޫސް އެޖެންސީ ބުނީ އެއީ އައިއެސް ޖަމާއަތުގެ ރޭވުމެއް ކަމަށާއި އޭގައި ހިމެނެނީ އުރުދުންގެ އަމަނާބެހޭ އިދާރާތަކާއި ވިޔަފާރީގެ މަރުކަޒުތަކާ އަދި މެދުމިނުގެ ފިކުރުގެ ދީނީ ޢިލްމުވެރިންނަށް ސިލްސިލާ ގޮތެއްގައި ހަމަލާދީ، ޤައުމު ހަމަނުޖެހުންތަކެއްގެ ތެރެއަށް ވައްޓާލުން ކަމަށެވެ.
އުރުދުންގެ އަމަނާބެހޭ ފަރާތްތަކުން ދާދިފަހުންވަނީ އައިއެސް ޖަމާއަތަށް ނިސްބަތްވާ ސަތާރަ މީހުން ހައްޔަރުކޮށްފައެވެ. އެ މީހުންގެ އަތުން ގިނަ ޢަދަދެއްގެ ހަތިޔާރާއި ގޮވާތަކެތި އަތުލައިގެންފައިވާ ކަމަށްވެސް އުރުދުންގެ ސަލާމަތީ ބާރުތަކުން ހާމަކޮށްފައިވެއެވެ.
އުރުދުންގައި ފުޅާދާއިރާއެއްގައި ޓެރަރިޒަމްގެ ޢަމަލުތައް ހިންގުމުގެ ރޭވުން ބޭޒާރުވެފައިވަނީ ހައްޔަރުކޮށްފައިވާ އައިއެސްގެ މީހުންނާ ސުވާލުކޮށް އެ މީހުންގެ ފަރާތުން ހޯދި މައުލޫމާތާއި ތަޙުޤީޤުތަކުން ކަމަށް ޚަބަރުތައް ބުނެއެވެ.
އުރުދުންގެ އަވަށްޓެރި ދެ ޤައުމު ކަމަށްވާ ސޫރިޔާ އާއި އިރާޤުގައި އައި.އެސް. ޖަމާޢަތް އެންމެ ވަރުގަދަވެގެން ދިޔަ ދުވަސްވަރުވެސް އުރުދުންގައި ފައިހަރުކޮށްލުމުގައި އައިއެސް ޖަމާއަތަށް ކާމިޔާބު ލިބިފައެއް ނުވެއެވެ.