ތުރުކީވިލާތުގެ ވެރިކަމުގެ ނިޒާމު ބަދަލުކުރުމަށްޓަކައި އެ ޤައުމަށް ގެންނަން އުޅުނު ނާކާމިޔާބު ބަޣާވާތުގެ ފަހަތުގައިވާ ފަތުހުﷲ ގުލެންއަށް އެމެރިކާއިން ހިޔާވަހިކަން ދެމުންގެންދާ މައްސަލައިގައި ތުރުކީވިލާތުން އެމެރިކާއަށް ބަހުގެ ޙަމަލާތަކެއް ދީފިއެވެ. ތުރުކީވިލާތުގެ ޚާރިޖީ ވަޒީރު މެވްލޫތު ޗަވުޝޮގްލޫ ވިދާޅުވީ ފަތުހުﷲ ގުލެން އަށް ހިޔާވަހިކަންދިނުމަކީ އެމެރިކާއިން ކުރާ ވަރަށް ބޮޑު ކުށެއްކަމަށާއި، އެކަން ރަނގަޅު ނުކުރާނަމަ ތުރުކީވިލާތާއި އެމެރިކާގެ ގުޅުންތައް ދުވަހެއް ދުވަހަކަށް ދާނީ ހީނަރުވަމުންކަމަށެވެ.
ޗަވުޝޮގްލޫ ވިދާޅުވީ ފަތުހުﷲ ގުލެން އަދާލަތަށް ޙާޒިރުކުރުމުގައި އެމެރިކާގެ އެއްބާރުލުން ނުލިބުމުގެ ސަބަބުން އެމެރިކާ އާއި ތުރުކީވިލާތުގެ ގުޅުންތައް ވަރަށްބޮޑަށް ގޯސްވެފައިވާކަމަށެވެ. މީގެ އިތުރުން ސޫރިޔާގައި ވަކިވެގަތުމަށް މަސައްކަތްކުރާ ކުރުދީ ޖަމާއަތްތަކަށް އެމެރިކާ އަސްކަރީ އެހީ ދިނުމަކީވެސް އެމެރިކާ އާއި ތުރުކީވިލާތުގެ އިތުބާރު ގެއްލިގެންދިޔަ ކަމެއްކަން ޗަވުޝޮގްލޫ ފާހަގަކުރެއްވިއެވެ.
ތުރުކީވިލާތުން ދާދި ފަހުންވަނީ އެ ޤައުމަށް ބޭނުންވާ ހަތިޔާރު އެމެރިކާގެ ރަޝިޔާއިން ގަންނަން ފަށާފައެވެ. މިއީ އެމެރިކާ އާއި ތުރުކީވިލާތުގެ ގުޅުން ނުތަނަވަސްވެފައިވާ މިންވަރު ހާމަވެގެންދާ ކަމެއްކަމަށް މުރާސިލުން ބުނެއެވެ.