އެމްޑީޕީގެ ޕާލިމެންޓަރީ ގުރޫޕުގެ މަޤާމްތަކަށް ކުރިމަތިލުމުގެ ފުރުސަތު ހުޅުވާލައިފިއެވެ.
އެމްޑީޕީން ބުނީ ދެހާސް ސާދަވަނަ އަހަރަށް އެޕާޓީގެ ޕާލިމެންޓަރީ ގްރޫޕުގެ މަޤާމްތަކަށް މެމްބަރުން އިންތިހާބުކުރުމަށް ބާއްވާ އިންތިޚާބު އަންނަ ޖޫންމަހުގެ އެއްވަނަ ދުވަހު ބޭއްވުމަށް ނިންމާފައިވާކަމަށެވެ. އަދި ޕާލިމެންޓަރީ ގުރޫޕުގެ މަޤާމްތަކަށް ކުރިމަތިލައްވަން ބޭނުންފުޅުވާ މެމްބަރުންނަށް މިމަހު ހަތާވީހުގެ ނިޔަލަށް އެފުރުސަތު އޮންނާނެކަމަށްވެސް އެޕާޓީން ބުނެއެވެ.
އެމްޑީޕީގެ ޕާލިމެންޓަރީ ގުރޫޕަށް މެމްބަރުން އިންތިހާބުކުރާ މަޤާމްތަކަކީ، ޕާލިމެންޓަރީ ގުރޫޕުގެ ލީޑަރާއި، ދެ ޑެޕިއުޓީ ލީޑަރުންނާއި، ސެކްޓްރީ ޖެނެރަލާއި، ސެކެޓްރީގެ ޖެނަރަލްގެ ނައިބުގެ އިތުރުން ތިން ވިޕުންނެވެ.
މިދިޔަ މާރޗްމަހު ބޭއްވި ރައްޔިތުންގެ މަޖިލީހުގެ އިންތިހާބުގައި އެމްޑީޕީއަށް ސައްބީސް ގޮނޑި ލިބުނު ނަމަވެސް، އެޕާޓީގެ މެމްބަރެއްގެ ގޮތުގައި ހުންނެވި ތިމަރަފުށި ދާއިރާގެ މެމްބަރު މުހައްމަދު މުސްތޮފާ ޕީޕީއެމްއަށް ސޮއިކުރުމުން އެމްޑީޕީގެ މަޖިލިސް މެމްބަރުންގެ އަދަދު ވަނީ ފަންސަވީހަށް މަދުވެފައެވެ.