މިނިސްޓަރ އޮފް ފޮރިން އެފެއަރޒް ޑރ.މުޙައްމަދު ޢާސިމް، މިހާރު ރާއްޖެ ވަޑައިގެން އުޅުއްވާ އދ ގެ އިންސާނީ ޙައްޤުތަކާބެހޭ ހައިކޮމިޝަނަރުގެ އޮފީހުގެ މަންދޫބު މޯނާ ރިޝްމާވީއާ ބައްދަލުކުރައްވައިފިއެވެ.
މޯނާ ރިޝްމާވީއަކީ، އދ ގެ އިންސާނީ ޙައްޤުތަކާބެހޭ ހައިކޮމިޝަނަރުގެ އޮފީހުގެ ޤާނޫނު ނެގެހެއްޓުމާ، ހަމަހަމަކަން އަދި ތަފާތުކުރުންތަކާ ދެކޮޅަށް މަސައްކަތްކުރާ ގޮފީގެ އިސްވެރިޔާއެވެ.
މޯނާ ރިޝްމާވީއާއެކު ފޮރިން މިނިސްޓަރ ބޭއްވެވި ބައްދަލުވުމުގައި ރާއްޖެއިން އދއަށް ދޭ އަހައްމިޔަތުކަން މިނިސްޓަރ ފާހަގަކުރެއްވިއެވެ. ވަކިން ޚާއްޞަގޮތެއްގައި "އޮފީސް އޮފް ދަ ޔުނައިޓެޑް ނޭޝަންސް ހައި ކޮމިޝަނަރ ފޯރ ހިއުމަން ރައިޓްސް(އޯއެޗްސީއެޗްއާރް)އާއެކު ރާއްޖެއިން ފާއިތުވި އަހަރުތަކުގައި ދަމަހައްޓަމުން އައި ބަދަހި ގުުޅުން ފާހަގަކުރައްވާ، މި ގުޅުން އިތުރަށް ބަދަހި ކުރެވިދާނެ ގޮތްތަކާ ބެހޭގޮތުން މަޝްވަރާ ކުރެއްވިއެވެ.
އޯއެޗްސީއެޗްއާރް ގެ މަންދޫބު މޯނާ ރިޝްމާވީ ރާއްޖެއަށް ކުރައްވަމުން ގެންދަވާ ދަތުރުފުޅުގެ މައްޗަށް އަލިއަޅުއްވާލައްވަމުން މިނިސްޓަރ ވިދާޅުވީ، ދިވެހި ސަރުކާރުން އޯއެޗްސީއެޗްއާރާއެކު މަޝްވަރާ ކުރުމަށް ޝައުޤުވެރިވާކަމަށާއި، މި ދަތުރަކީވެސް މިކަމުގެ ތެރެއިން މަގުފަހިވީ ދަތުރެއްކަމުގައެވެ.
މީގެއިތުރުން ދިވެހި ރާއްޖޭގެ ޖުމްހޫރިއްޔާގެ ޤާނޫނު އަސާސީ ނެގެހެއްޓުމާ، ޑިމޮކްރަސީގެ ހަމަތައް ކަށަވަރުކުރުމުގައި ދިވެހި ސަރުކާރުން ދެމިތިބޭނެކަމުގެ ޔަޤީންކަން އޯއެޗްސީއެޗްއާރުގެ މަންދޫބަށް މިނިސްޓަރ ދެއްވިއެވެ.
އޯއެޗްސީއެޗްއާރުގެ މަންދޫބު މޯނާ ރިޝްމާވީ ރާއްޖެއަށް ދަތުރުފުޅެއް މިކުރެއްވީ ރާއްޖޭގެ ސިޔާސީ ޙާލަތު ވަޒަންކުރުމަށް ބައިނަލް އަޤުވާމީ ޤައުމުތަކަށާއި، ޖަމްޢިއްޔާ ޖަމަޢާތްތަކަށާއި ރާއްޖޭގެ ތަރައްޤީގެ ބައިވެރިންނަށް، ސަރުކާރުން ދަޢުވަތު އަރުވާފައިވާ ދަނޑިވަޅެއްގައެވެ.
މިކަމަށް ޢިޝާރާތްކުރައްވާ ފޮރިން މިނިސްޓަރ ޑރ.އާސިމް ވިދާޅުވީ ރާއްޖޭގެ ޙާލަތު ބެލުމަށް ބައިނަލް އަޤުވާމީ ފަރާތްތަކަށް ރާއްޖެއިން ދިން ފުރުޞަތުގެ ބޭނުންހިފާ، މިކަންކުރަން ރާއްޖެއަންނަ ފަރާތްތަކަށް ދިވެހި ސަރުކާރުން ފުރިހަމަ އެއްބާރުލުންދޭނެކަމަށެވެ.
މިބައްދަލުވުމުގައި މިނިސްޓަރާއެކު ރާއްޖޭގެ ފޮރިން ސެކްރެޓަރީ އަޙްމަދު ސަރީރާއި، އދއިން ރާއްޖެއަށް ކަޑައަޅާފައި ހުންނަވާ ސަފީރު ޝޯކޯ ނޯޑާއާއި ފޮރިން މިނިސްޓްރީގެ އެޑިޝަނަލް ސެކްރެޓަރީ ޖާވިދު ފައިސަލް ބައިވެރިވިއެވެ.