ޔުނައިޓެޑް ވިކްޓަރީ އޮތީ ސީޒަނަށް އައްޑިހަފަސް ޕަސެންޓު ތައްޔާރުވެފަކަމަށް އެޓީމުގެ ކޯޗު މުހަންމަދު ނަޒީހު ބުނެފިއެވެ.
އެސްޓިއޯ މާލޭ ލީގުގައި ވެލެންސިޔާއާ ދެކޮޅަށް ނިކުތުމުގެ ކުރިން ވާހަކަދައްކަމުން ޔުނައިޓެޑް ވިކްޓްރީ (ޔޫވީ) ކޯޗު ނަޒީހު ބުނީ މިދިޔަ އަހަރާ ހިލާފަށް މިއަހަރު އޭނާއަށް ލިބުނީ އޭނާ ބޭނުންވާކަހަލަ ޓީމެއްކަމަށާއި، ޔޫވީ އޮތީ ފުރިހަމައަށް ތައްޔާރަށްކަމަށެވެ. މިދިޔަ އަހަރުގެ ވަކި ހިސާބަކުން ޓީމާ ހަވާލުވި ނަޒީހު ބުނީ އަމާޒަކީ ގަދަ ހަތަރެއް ކަމަށާއި، މާލޭ ލީގުން ގަދަ ހަޓީމު ޕްރިމިއަރ ލީގަކަށް ކޮލިފައިވުމުގެ ފުރުސަތު އޮތަސް މާލޭ ލީގުގައިވެސް އޭނާ ބޭނުންވަނީ ގަދަ ހަތަރެއް ކަމަށެވެ. އެ އަމާޒަށް ވާސިލްވުމައްޓަކައި ޓީމް އޮތީ ތައްޔާރަށްކަމަށް ނަޒީހު ބުންޏެވެ.
" މިދިޔަ އަހަރާ އަޅާބަލާއިރު މިއަހަރު ޓީމް ރަނގަޅުވާނެ، މިއަހަރު ހާލަތު ތަފާތު. އަޅުގަނޑު ބޭނުންވާކަހަލަ ޓީމެއް މިއޮތީ" ނަޒީހު ބުންޏެވެ.
ނަޒީހު ބުނީ މެޗު ކުރިން ޓީމްގައި ތިބި ޒުވާން ކުޅުންތެރިންގެ ހިތް މަރުވާ ކަހަލަ ވާހަކަދައްކަން ބޭނުންނުވާ ކަމަށާއި، ޔުނައިޓެޑް ވިކްޓްރީ ނުކުންނާނީ ވަރުގަދަ ޓީމްތައް އަތުން މަދުވެގެން ޕޮއިންޓެއް ހޯދަންކަމަށެވެ. މެޗުގެ ކުރިން ވާހަކަދައްކަމުން ވެލެންސިޔާގެ ކޯޗު ސޮބާހު މުހަންމަދު ބުނީ ރަނގަޅު ޕްރީސީނެއް ނެތި ލީގާ ކުރިމަތި ލުމަކީ މިވަގުތައް އޮތް ގޮންޖެހުމެއް ކަމަށާއި، ޓީމަށް އަލަށް ގުޅުނު ބިދޭސީ ކުޅުންތެރިންނަށްވެސް ކުރެވުނީ ޓީމާއެކު މަދު ޕްރެކްޓްސްތަކެއްކަމަށެވެ. ސޮބާ ބުނީ ދައްކާނެ އިތުރު ވާހަކައެއް ނެތްކަމަށާއި، ޓީމްގެ ފެންވަރާމެދު އެއްޗެއް ބުނަން އެނގޭނީ މުބާރާތުގެ ފުރަތަމަ މެޗު ކާމިޔާބުކޮށްގެން ކަމަށް. އެހެންކަމުން މެޗުން މޮޅުވުމުގެ މުހިންމުކަން ސޮބާ ވަނީ ފާހަގަކޮއްފައެވެ.
" ތައްޔާރުވުންތައް ދިޔައީ އެހާ ހިތްހަމަޖޭ ގޮތަކަށްނޫން. ރަނގަޅު ޕްރީސީޒަނެއް ނެތި ލީގުގެ ފުރަތަމަ މެޗަށް ނުކުންނައިރު އެއީ ބޮޑު ގޮންޖެހުމެއް." ޞޮބާ ބުންޏެވެ.
ސޮބާހު ބުނީ ވެލެންސިޔާ ލީގަށް ނުކުންނަނީ އެންމެ ދަށް ޓީމުގެ ގޮތުގަ ކަމަށާއި، އޭނާ ރޭންކް ކުރާނީ ވެލެންސިޔާ މިވަގުތަށް ލީގުގެ އަށްވަނައިގަކަމަށެވެ. އެސްޓިއޯ މާލެ ލީގުގައި ވެލެންސިޔާއާއި ޔުނައިޓެޑް ވިކްޓްރީ ބައްދަލުކުރާ މެޗު ކުޅޭނީ މިރެއެވެ.