ހދ ކުޅުދުށްފުށީގައި މި އަހަރުގެ މެދެއްހާތަނގައި ސްކޫލް ބަހުގެ ޚިދުމަތް ފެށުމަށް ތައްޔާރުވަމުންދާކަމަށް މޯލްޑިވްސް ޕޯޓްސް ލިމިޓެޑް، އެމް.ޕީ.އެލުން ބުނެފިއެވެ. އެކުންފުނިން ބުނީ ކުޅުދުށްފުށީގައި ބަހުގެ ހިދުމަތް ދިނުމަށް ބޭނުންވާ ބަސްތައް ހޯދުމުގެ މަސައްކަތް ކުރަމުންދާކަމަށެވެ.
އެމް.ޕީ.އެލުން މިހާރުވެސް އަންނަނީ ދެކުނުގެ 2 އަތޮޅުކަމަށްވާ ފުވައްމުލައް ސިޓީ އަދި އައްޑޫ ސިޓީގެ އިތުރުން ރާއްޖޭގެ އެންމެ ބޮޑު ލިންކް ރޯޑްކަމަށްވާ ލާމު ލިންކް ރޯޑުގައިވެސް ކާމިޔާބުކަމާއެކު ބަހުގެ ޚިދުމަތް އާއްމު ރައްޔިތުންނަށް ދެމުންނެވެ.
ރާއްޖޭގެ އާބާދީ ބޮޑު ސަރަޙައްދުތަކަށް ޕަބްލިކް ޓްރާންސްޕޯޓުގެ ދަށުން ބަހުގެ ޚިދުމަތް ފޯރުކޮށްދިނުމަކީ އެމް.ޕީ.އެލްގެ ވަރަށް ބޮޑު އަމާޒެކެވެ. އެގޮތުން މާލޭ ސަރަޙައްދަށް ބަހުގެ ޚިދުމަތް ތަޢާރަފުކުރުމުގެ މަސައްކަތް އެމް.ޕީ.އެލުން މިހާރު ފަށާފައިވާއިރު، ރާއްޖޭގެ އުތުރުން ހދ. ކުޅުދުއްފުށީގައި ސްކޫލް ބަހުގެ ޚިދުމަތް ފެށުމަށްޓަކާވެސް އެކުންފުނިން އަންނަނީ ތައްޔާރުވަމުންނެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން އެމް.ޕީ.އެލްގެ އެސިސްޓެންޓް ސީ.އީ.އޯ ރާބިޙް މުޙައްމަދު ވިދާޅުވީ، އެންމެ ފަސޭހައިން މި ޚިދުމަތް ދެވޭނެ ގޮތްތަކަކީ ކޮބައިތޯ ބަލައި، ކުޅުދުއްފުށީ މަގުތަކަށް އެންމެ އެކަށީގެންވާ ސައިޒުގެ ބަސްތައް ހޯދުމުގެ މަސައްކަތް ކުރަމުންދާކަމަށެވެ. ކުޅުދުއްފުއްޓަށް ސްކޫލް ބަހުގެ ޚިދުމަތް ތަޢާރަފުކުރާއިރު އެންމެ ފުރަތަމަ ބޭނުންކުރުމަށް ނިންމާފައިވަނީ ގާތްގަނޑަކަށް 20 ފަސިންޖަރުން އުފުލޭ ވަރުގެ ކުދި ބަސްތަކެއްކަމަށެވެ. އަދި ހުޅުލޭ މާލޭ ބްރިޖްގައި ބަހުގެ ހިދުމަތް ދިނުމަށް ބޭނުންވާ ބަސްތައް ރާއްޖެ ގެންނައިރު ކުޅުދުށްފުށީގައި ބޭނުންކުރާނެ ބަސްތައްވެސް ރާއްޖެ ގެނައުމަށް މަސައްކަތްކުރަމުންދާކަމަށްވެސް ރާބިޙް ވިދާޅުވިއެވެ.
ރާބިޙް ވިދާޅުވީ، ބަހުގެ ޚިދުމަތް ދިނުމުގައި އެމް.ޕީ.އެލްގެ މައިގަނޑު މަޤްޞަދަކީ ވިޔަފާރި އުސޫލުން ބޮޑު މަންފާއެއް ހޯދުމަށްވުރެ، އާއްމު ރައްޔިތުންނަށް ފެންވަރު ރަނގަޅު ޚިދުމަތެއް ފޯރުކޮށްދިނުންކަމަށެވެ. އެގޮތުން އެކުންފުނިން މިހާރުވެސް ބަހުގެ ޚިދުމަތް ދެމުން އަންނަ ސަރަޙައްދުތަކުގައި ދިރިއުޅޭ އާއްމުންގެ ފަރާތުން ބަހުގެ ޙިދުމަތާމެދު ރަނގަޅު ކޮމެންޓްތަކެއް ލިބެމުންދާކަމަށާއި، އުއްމީދަކީ ދެމެހެއްޓެނިވި ނިޒާމެއްގެ ތެރެއިން މި ޚިދުމަތް ދިނުންކަމަށްވެސް ރާބިޙް ވިދާޅުވިއެވެ.
މާލޭ ސަރަޙައްދާއި ހދ ކުޅުދުއްފުށި ހިމެނޭހެން ބަހުގެ ޚިދުމަތް ތަޢާރަފުކުރުމަށް އެމް.ޕީ.އެލުން މަސައްކަތް ކުރަމުންދާއިރު މިއީ ގާތްގަނޑަކަށް 100 މިލިއަން ރުފިޔާގެ މަޝްރޫޢެއްކަމަށް އެކުންފުނިން ބުނެއެވެ. އަދި ބްރިޖްގެ މެދުވެރިކޮށް ބަހުގެ ޚިދުމަތް ދިނުމަށް ބޭނުންވާ ބަސްތަކާއި، ހދ. ކުޅުދުއްފުއްޓަށް ބޭނުންވާ ސްކޫލް ބަސްތައް މި އަހަރުގެ މެދެއްހާ ހިސާބުގައި ރާއްޖެ ގެނެވޭނެކަމަށްވެސް އެމް.ޕީ.އެލުން ހާމަކުރެއެވެ.