އޭވީސީ ސެންޓްރަލް ޒޯން ވޮލީބޯޅަ މުބާރާތުގައި ރާއްޖެ ކުޅުނު ފުރަތަމަ މެޗުން ބަލިވެއްޖެއެވެ.
މިއަދު ހަވީރު ކުޅުނު މި މެޗުން ރާއްޖެ ބަލިވީ ނޭޕާލާ ވާދަކޮށް ސީދާ ތިން ސެޓުންނެވެ. މި މެޗުގެ ސެޓުތައް ނޭޕާލުން ގެންދިޔައީ 25،21 ، 25،17 އަދި 25،15 ނެވެ. މި މެޗުގެ ތިން ސެޓުގައިވެސް ލީޑު ނަގައިގެން ކުޅެފައިވަނީ ނޭޕާލް ޓީމުންނެވެ. މެޗުގެ ފުރަތަމަ ސެޓުގައި ރާއްޖެއަށް ނޭޕާލް ކައިރި ރަނގަޅުކުޅުމެއް ދެއްކުނުނަމަވެސް، ފަހުން ކުޅުނު ދެ ސެޓުގައި ރާއްޖޭގެ ކުޅުން ފެނިގެންދިޔައީ ދަށްކޮށެވެ. ހާއްސަކޮށް މެޗުގެ ފަހު ސެޓު ވެގެންދިޔައީ ރާއްޖެއަށް ޕްރެޝަރު ބޮޑު ސެޓަކަށެވެ.
މެޗަށް ފަހު ވާހަކަދައްކަމުން ރާއްޖޭގެ ޤައުމީ ވޮލީބޯޅަ ޓީމުގެ ކޯޗު މުހައްމަދު ސާޖިދު ބުނީ، މެޗުގެ ފުރަތަމަ ދެ ސެޓުގައި ރަނގަޅަށް ކުޅެވުނު ކަމަށާއި، މި މެޗުގައި ކުޅުންތެރިން ތިބީ ވަރަށް ޕްރެޝަރުގައި ކަމަށެވެ. ސާޖިދު ބުނީ ޓްރެއިނިންގ ދަތުރުގައި ތައިލެންޑްގެ ޤައުމީ ޓީމާ ދެކޮޅަށް ކުޅުނު މެޗުގައި، ކުޅުންތެރިން އެއްވެސް ވަރަކަށް ޕްރެޝަރަށް ގޮސްފައި ނުވާކަމަށާއި، ތައިލެންޑް ޓީމަކީ ނޭޕާލް ޓީމަށްވުރެ ވަރުގަދަ ޓީމެއްކަަމަށެވެ.
"މެޗުގެ ފުރަތަމަ ދެ ސެޓުގައި ވަރަށް ރަނގަޅަށް ޓީމު ކުޅުނީ، ދެން މުޅި މެޗުގައިވެސް ކުޅުންތެރިން ތިބީ ވަރަށް ބޮޑަށް ޕްރެޝަރުގައި. އަސްލު ނޭންގެ ކީއްވެ ކަމެއް. ނޭޕާލް އަށް ވުރެ ވަރުގަަދަ ޓީމެ ތައިލެންޑްގެ ޤައުމީ ވޮލީ ޓީމަކީ. އެޓީމު ބަލިކޮށްފައި މި އައީ މުބާރާތަށް. އެ މެޗު އެއްވެސް ޕްރެޝަރެއް ނެތި ކުޅުނީވެސް." ކޯޗު މުހައްމަދު ސާޖިދު ބުންޏެވެ.
މިއަދުގެ މެޗުގައި ރާއްޖޭގެ ޓީމުގައި ރަނގަޅު ކުޅުމެއް ދެއްކި އަލީ ހުޒާމް ބުނީ، މިއަދުގެ މެޗު ދިޔައީ ވަރަށް ދައްކޮށް ކަމަށާއި، މެޗުގެ ނަތީޖާ އާއި ދޭތެރޭ ހިތްހަމަނުޖެހޭކަމަށެވެ. ހުޒާމް ބުނީ މިއަދުގެ މެޗުގައި ޓީމަށް ދިމާވި އެންމެ ބޮޑު އެއް މައްސަަލައަކީ ޓީމު ޕްރެޝަރަށް ދިއުމާއި، ނަގަން ޖެހޭ ޑިޒިޝަންތައް ގޯސްވުންކަމަށެވެ.
"މިއަދު މެޗުގެ ކުޅުންދިޔައީ ވަރަށް ދަށްކޮށް، އެއްވެސްވަރަކަށް ހިތްހަމައެއް ނުޖެހޭ މެޗުގެ ނަތީޖާ އާއި ދޭތެރޭ. ދެން މެޗުގައި ޓީމަށް ދިމާވި އެންމެ ބޮޑު މައްސަލައަކީ މާ އަަވަހަށް ޓީމު ޕްރެޝަރަށް ދިއުމާއި، ނަގަން ޖެހޭ ޑިޒިޝަންތައް ގޯސްވުމާއި ރިސީވް ކުރުމުގެ މައްސަލަތައް ދިމާވި. ދެން ވެދާނެ މުޅިން އާ ޓީމެއް ގޮވައިގެން މިފަދަ ބޮޑު މުބާރާތެއްގައި ކުޅުނު ފުރަތަމަ މެޗަށް ވީމަކަމަށްވެސް." އަލީ ހުޒާމް ބުންޏެވެ.
މި މުބާރާތުގައި ރާއްޖެ ކުޅެންޖެހޭ ދެވަނަ މެޗުގައި މާދަމާ ހަވީރު ވާދަކުރަން ޖެހޭނީ މުބާރާތް ބާއްވާ ޤައުމުކަމަށްވާ ބަނގްލަދޭޝް އާއި ދެކޮޅަށެވެ. ރާއްޖެއަށް ސެމީ ފައިނަލުން ޖާގައެއް ލިބެން އަންނަނީ މާދަމާގެ މެޗު ސީދާ ތިން ސެޓުން ކާމިޔާބުކޮށްގެންނެވެ.