ކުޅިވަރު އެކުވެނި އައުޓްޑޯގައި މިނީ 3 ދަނޑު މިއަދު ހުޅުވައިފިއެވެ.
ތިން ދަނޑު މިއަދު ހުޅުއްވައިދެއްވީ އިކޮނޮމިކް މިނިސްޓަރ މުޙައްމަދު ސައީދުއެވެ. މިއީ އޭޝިޔަން ފުޓްބޯޅަ ކޮންފެޑެރޭޝަންގެ ރައީސްގެ އިންނެންގެވުމުގެ ދަށުން ކުރިއަށްގެންދަވާ ޕްރޮގެކްޓްގެ ތެރެއިން ރާއްޖޭގައި އެޅި ތިން މިނީ ދަނޑެވެ. އެއް ޞަރަހައްދެއްގައި ގުޅިގެންވާގޮތަށް މިނީ ތިން ދަނޑު އެޅީ އެއްކޮށްލައިގެން އެއް ދަނޑުގެ ގޮތުގައިވެސް ބޭނުންކުރެވޭ ގޮތަށެވެ.
މިދަނޑުތައް ބޮޑަށް ބޭނުންކުރާނީ " ޓު ވާރޑްސް ފިއުޗަރ " ޕްރޮޖެކްޓްގެ ދަށުން ހިންގާ ހަރަކާތްތަކަށެވެ. އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ މިއީ އެކަޑަމީތަކަށް ޚާއްޞަކޮށްފައިވާ ދަނޑުތަކެއް ކަމަށެވެ. ރާއްޖޭގެ އެކި އެކަޑަމީތަކަށް ދަނޑު ބޭނުންކުރުމުގެ ފުރުޞަތު ދޭނެކަމަށް ބައްސާމް ވިދާޅުވިއެވެ. މިދަނޑުތައް ހުޅުވުމުން ގަދަ އަވީގައި ތަމްރީނުތައް ކުރިއަށްގެންދާ ކުޑަކުދިންނަށް ކޮންމެވެސް ވަރެއްގެ ހައްލެއް ލިބިގެންދާނެއެވެ. އަދި އެކަޑަމީތައް ގިނަވެ، ބައިވެރިވާ ދަރިވަރުންގެ އަދަދު އިތުރުވަމުން އައުމާއެކު ކުރިމަތިވެފައިވާ ޖާގައިގެ ދަތިކަމަށްވެސް ކޮންމެވެސް ވަރެއްގެ ހައްލެއް ލިބޭނެއެވެ.
މިއީ ސީދާ އޭއެފްސީން ޚަރަދުކުރައްވައިގެން އެޅި ތިން ދަނޑުކަމަށް އެފްއޭއެމްއިން މައުލޫމާތުދެއްވައެވެ.