ކޮރެއާ ބައްރުގެ ސުލްޙައަށް ކުރާ މަސައްކަތާއި އެމެރިކާގެ ދިފާޢީ އެއްބަސްވުންތަކާ ގުޅުމެއް ނެތް- ބޯލްޓަން
ކޮރެއާ ބައްރުގައި ސުލްޙަ ޤާއިމުކުރުމަށް ކުރަމުންގެންދާ މަސައްކަތްތަކާއި، އެމެރިކާ އާއި ދެކުނު ކޮރެޔާއާ ދެމެދު ސޮއިކޮށްފައިވާ ދިފާޢީ އެއްބަސްވުންތަކާ ގުޅުމެއް ނެތްކަމަށް ވައިޓް ހައުސްއިން ބުނެފިއެވެ.
އެމެރިކާއަށް ވަޑައިގެން އުޅުއްވާ ދެކުނު ކޮރެޔާގެ ޤައުމީ ސަލާމަތާބެހޭ ވެރިޔާ ޗޮންގް އިޔުވީ އާއި އެމެރިކާގެ ޤައުމީ ސަލާމަތާ ބެހޭ މުސްތަޝާރު ޖޯން ބޯލްޓަން ބައްދަލުކުރައްވައި ކުރެއްވި މަޝްވަރާތަކަށްފަހު ވައިޓް ހައުސުން ނެރުނު ބަޔާނެއްގައި ބުނެފައިވަނީ، އެމެރިކާ އާއި ދެކުނު ކޮރެޔާއާ ދެމެދުގައިވާ ދިފާޢީ ގުޅުންތައް މުސްތަޤުބަލުގައިވެސް ކުރިއަށްގެންދިޔުމަށް ދެ ޤައުމުން އެއްބަސްވާކަމަށެވެ.
ކޮރެއާ ބައްރުގައި ސުލްޙަ ޤާއިމުކޮށް، އެ ބައްރުން ނިއުކްލިޔަރ ހަތިޔާރު ނައްތާލުމަށް ކުރަމުންގެންދާ މަސައްކަތްތަކާއި، އެމެރިކާ އާއި ދެކުނު ކޮރެޔާއާ ދެމެދު ސޮއިކޮށްފައިވާ ދިފާޢީ އެއްބަސްވުންތަކާ ގުޅުމެއް ނެތްކަމަށްވެސް މި ބަޔާން ބުނެއެވެ. އުތުރުކޮރެޔާ ގެންދަނީ އެމެރިކާގެ ނަވާވީސް ހާސް ސިފައިންގެ މައްޗަށް އެކުލެވޭ އަސްކަރީ ލަޝްކަރެއް ދެކުނު ކޮރެޔާގައި ރުކުރުވާލާފައިވާ މައްސަލައިގައި ކަންބޮޑުވާކަން ހާމަކުރަމުންނެވެ.
އެހެންނަމަވެސް އެމެރިކާގެ ރައީސް ޑޮނަލްޑް ޓްރަމްޕާއި އުތުރުކޮރެޔާގެ ޒައީމު ކިމް ޖޮންގް އުންއާ ދެމެދު ބޭއްވުމަށް ހަމަޖެހިފައިވާ ސަމިޓުގައި މިކަމާ ގުޅުންހުރި މަޝްވަރާތައް ކުރިއަށްގެންދާނެކަމަށް، އެމެރިކާގެ ދިފާޢީ ވުޒާރާއިން ބުނެއެވެ.