ނިއުކްލިޔަރ ހަތިޔާރު އުފެއްދުމުގެ ޤާބިލުކަންއލިބިފައިވާ ޤައުމުތަކުގެ ސަބަބުން މުޅި ދުނިޔެއަށް ނުރައްކާވަމުންދާކަމަށް ތުރުކީވިލާތުގެ ރައީސް ތައްޔިބު އުރުދުޣާން ވިދާޅުވެއްޖެއެވެ. ތުރުކީވިލާތުގެ ވެރިރަށް އަންކާރާގައި ހުންނަވާ ވާހަކަދައްކަވަމުން އުރުދުޣާން ވިދާޅުވީ، ދުނިޔޭގެ އެކި ކަންކޮޅުތަކުގައި މިވަގުތު އެއް ހާސް ފަސް ސަތޭކަ ނިއުކްލިޔަރ ވޯ ހެޑް ރައްކާކޮށްފައިވާއިރު، މި ހަތިޔާރުތަކުގެ ސަބަބުން މުޅި ދުނިޔެއަށް ނުރައްކާތައް ކުރިމަތިވަމުންދާ ކަމަށެވެ.
މުޅި މެދު އިރުމަތިން ވެސް ނިއުކްލިޔަރ ހަތިޔާރު ނައްތާލަން ޖެހޭ ކަމަށާއި، އެ ސަރަހައްދުގައި މި ހާތިޔާރުގެ ބޭނުމެއް ނެތްކަމަށް އުރުދުޣާން ވިދާޅުވިއެވެ. އުރުދުޣާންގެ ވާހަކަތަކުގައި ވަނީ، 2015 ވަނަ އަހަރު ޤާއިމުކުރި އީރާން ނިއުކްލިޔަރ އެއްބަސްވުމުން އެމެރިކާ ވަކިވި މައްސަލައަށް އަލިއަޅުއްވާލައްވާފައެވެ.
ތުރުކީވިލާތުގެ ރައީސް ވިދާޅުވީ، އެ އެއްބަސްވުމުގައި ހުރި މައްސަލަތައް އަލުން ފާހަގަކޮށް، އެ މައްސަލަތަކާ ބެހޭގޮތުން މަޝްވަރާކުރުމަކީ ތުރުކީވިލާތުން ޤަބޫލުކުރާ ކަމެއް ނޫންކަމަށެވެ. އެމެރިކާއިން މި އެއްބަސްވުމުން ވަކިވިނަމަވެސް، އެއްބަސްވުމުގައި ބައިވެރިވި އެހެން ޤައުމުތަކުން މިއެއްބަސްވުން ދަމަހައްޓަން ބޭނުންވާކަމީ ރަނގަޅު ނިޝާނެއްކަމަށް އުރުދުޣާން ވިދާޅުވިއެވެ.