ލިވަޕޫލްގެ މުހައްމަދު ސަލާހުއަށް އަނިޔާވި މައްސަލާގައި އެންމެ ފަހުން ރެއާލް މެޑްރިޑުގެ ކެޕްޓަން ސާޖިއޯ ރާމޯސް ރައްދުދީފިއެވެ.
ޗެމްޕިއަންސް ލީގުގެ ފައިނަލް މެޗުގެ ވަރަށް ކުރީކޮޅު ލިވަޕޫލްގެ މިސުރު ފޯވަޑް ސަލާހުގެ ކޮނޑުހުޅު ނެއްޓި ދަނޑުން ބާލަން ޖެހުނީ ރާމޯސް ކުރި ފައުލާ ގުޅިގެންނެވެ.
ނަމަވެސް ސްޕޭނުގެ ކެޕްޓަން ބުނީ އޭނާގެ އަތުގައި ފުރަތަމަ ހިފެހެއްޓީ ސަލާހް ކަމަށެވެ.
"އަހަރެން އަސްލު މިވާހަކަ ދައްކާކަށް ބޭނުމެއްވެސްނޫން. އެކަމަކު މިހާރު މިކަން މިވަނީ ރާމޯސް (ގަސްތުގައި) ކުރި ކަމަކަށް. ފުރަތަމަ އަހަރެން އަތުގައި ހިފެހެއްޓީ ސަލާހް. އަހަރެން ވެއްޓިގަތީ އަނެއް ފަރާތަށް. އަހަރެން ވެއްޓިގަތް ފަރާތްނޫން ސަލާހުގެ އަނެއް ފަރާތު ކޮނޑަށް އަނިޔާވީ. އަހަރެން އޭނާ އަށް ފަހުން މެސެޖްކުރިން މިކަމާ ގުޅިގެން. އޭނާގެ ޝަކުވާއެއްނެތް،" ރާމޯސް ބުންޏެވެ.
އޭނާ ބުނީ ސަލާހް އިންޖިކްޝަން ޖަހައިގެން ކުޅެން އުޅުނުނަމަ ފަހު ހާފުގައި ކުޅެވުނީސް ކަމަށެވެ.
" އަހަރެންވެސް ބައެއް ފަހަރު ހުންނާނެ މިފަދަ ކަންތައް ދިމާވީމަ އިންޖިކްޝަން ޖަހައިގެން ކުޅެފަ. އޭނާ އިންޖިކްޝަން ޖެހިނަމަ ފަހުހާފު ކުޅެވިދާނެ،" ރާމޯސް ބުންޏެވެ.
މި މައްސަލާގައި މިސުރާއި ލިވަޕޫލްގެ ސަޕޯޓަރުން ވަނީ ރާމޯސް ދެކެ ވަރަށް ބޮޑަށް ރުޅި އައިސްފަ އެވެ. ބައެއް މީހުން ވަނީ ރާމޯސްއަށް އަދަބުދޭން ގޮވާލައި ޕެޓިޝަން ވެސް ހަދައިފަ އެވެ.