ވެމްކޯއިން ދެމުންގެންދާ ކުނި ނެގުމުގެ ޚިދުމަތާ ގުޅިގެން ޝަކުވާ ލިބެމުންދާ މިންވަރު ވަރަށްބޮޑަށް މަދުވެފައިވާ ކަމަށް ވޭސްޓްމެނޭޖްމެންޓް ކޯޕަރޭޝަން، ވެމްކޯއިން ބުނެފިއެވެ. އަދި ކުރިއަށް އޮތްތަނުގައިވެސް ރައްޔިތުންނަށް ފެންވަރު ރަނގަޅު ޚިދުމަތެއް ދިނުމަށް މަސައްކަތްކުރާނެކަމަށް އެކޯޕަރޭޝަނުން ބުނެއެވެ.
މާލޭގެ ކުނީގެ މައްސަލަ ޙައްލުކުރުމަށް ސަރުކާރުން އެޅި ފިޔަވަޅުތަކުގެތެރެއިން، މާލޭގެ ކުނި މެނޭޖްކުރުމުގެ މަސައްކަތް ވެމްކޯއާ ޙަވާލުކުރީ މީގެ އަށްމަސްކުރިންނެވެ. ވެމްކޯއިން ޚިދްމަތް ފަށައިގަތްއިރު، ޚިދްމަތާދޭތެރޭ ޢާއްމުންގެ ޝަކުވާ ވަރަށް ބޮޑެވެ. އެހެންކަމުން ވެމްކޯގެ ޢަމާޒަކަށްވީ، ފެންވަރު ރަނގަޅު ޚިދްމަތެއް ޢާއްމުންނަށް ފޯރުވައިދިނުމެވެ.
މިމަޤުޞަދުގައި، ވެމްކޯއިން މިދިޔަ އަށްމަހުގެ ތެރޭގައި ކުރި މަސައްކަތުން ވެމްކޯގެ ކުނިނެގުމުގެ ޚިދުމަތާމެދު ޢާއްމުން ޝަކުވާ ކުރާ މިންވަރު ވަރަށް މަދުވެފައިވާކަމަށް އެކޯޕަރޭޝަނުން ބުނެއެވެ.
ޕީއެސްއެމް ނިއުސްގެ ރާއްޖެ މިއަަދު ޕްރޮގްރާމުގައި ވާހަކަދައްކަވަމުން ވޭސްޓް މެނޭޖްމެންޓް ކޯޕަރޭޝަން ވެމްކޯގެ އެސިސްޓެންޓް މެނޭޖަރ ކޮމަރޝަލް ސަރވިސް ޢަބްދުﷲ ސިނާން ވިދާޅުވީ، ވެމްކޯގެ ޚިދްމަތް ފުރިހަމަކޮށް މިހާރު މާލޭގެ އަށާރަ ހާސް ގޭބިސީއަކަށް ޚިދްމަތްދެމުންދާކަމަށެވެ. އޭނާ ވިދާޅުވީ، ކުދިކުދި މައްސަލަތައް ދިމާވެގެން ކުނި ނުނެގޭފަދަ ޙާލަތެއް މެދުވެރިވެދާނެކަމަށާއި، އެފަދަ މައްސަލައެއް ދިމާވެއްޖެނަމަ، ވެމްކޯގެ ކަސްޓަމަރ ކެއަރއަށް ގުޅާލުމުން އެކަން ޙައްލުކޮށްދޭނެކަމަށެވެ.
އަދި ވެމްކޯއިން ކުނި ނަގާ ގޭބިސީއެއްކަން ވެށިފާރަވެރިންނަށް އެނގޭނެހެން އެގޭބިސީއެއްގެ ބޭރުގައި ޚާއްސަ ސްޓިކާއެއް ވެމްކޯއިން ތަތްކުރާކަމަށާއި ބައެއް ގޭބިސީތަކުން މިކަމުގައި އެއްބާރުލުން ނުދޭކަން އޭނާ ވަނީ ފާހަގަކުރައްވާފައެވެ. މިއީ ކުނި ޤަވާއިދުން ނެގުމަށް ފަސޭހަ ކުރުމުގެގޮތުން ޖަހާ ސްޓިކަރއެއްކަން ފާހަގަކުރައްވާ، އާއްމުން މިކަމަށް އެއްބާރުލުން ދިނުމަށް އޭނާ އިލްތިމާސްކުރެއްވިއެވެ.
ވެމްކޯގެ ކުނިނެގުމުގައި ޙަރަކާތްތެރިވާ ޑިއުޓީ އޮފިސަރުންނާއި ވެށިފާރަވެރިން ކުނިނެގުމުގައި މިހާރު ބޭނުންކުރަނީ ޒަމާނީ ވަޞީލަތްތަކެވެ. އެގޮތުން، ކުނި މެނޭޖްކުރުމުގައި ޙަރަކާތްތެރިވާ ޑިއުޓީ އޮފިސަރުންނާއި، ވެށި ފާރަވެރިން ކުނި ނަގާއިރު ޓެބްލެޓުގެ އެހީގައި މަޢުލޫމާތު ވަގުތުން ވަގުތައް އަޕްޑޭޓު ކުރަމުންދާކަން ފާހގަކުރެވެއެވެ.
ވޭސްޓް މެނޭޖްމެންޓް ކޯޕަރޭޝަން، ވެމްކޯއިން ބުނާގޮތުގައި ކުނި ނެގުމުގައި ދިމާވާ މައިގަނޑު އެއްމައްސަލައަކީ ކުނިބަލާދާއިރު ބައެއް ގޭބިސީތައް ތަޅުލާފައިހުރުމެވެ. އަދި މިފަދަ ޙާލަތްތަކުގައި ކުނިނުނެގޭ ކަމާއި ސަބަބު ވަރަށް ތަފްޞީލުކޮށް ވެމްކޯގެ މުވައްޒަފުން ވަގުތުން ވަގުތަށް ޓެބްލެޓް މެދުވެރިކޮށް އަޕްޑޭޓްކުރަމުންދާކަމަށް ވެމްކޯއިން ބުނެއެވެ.
އަދި ކުނިނުނަގާކަމުގެ ޝަކުވާއެއް ލިބިއްޖެނަމަ، އެކަން ޙައްލުކުރުމަށް މަސައްކަތް ކުރަމުންދާ ވެމްކޯއިން ބުނެއެވެ. އަދި އެއްވެސް ސަބަބަކާހުރެ 24 ގަޑިއިރުގެ ތެރޭގައި ކުނި ނުނަގާނަމަ އެކަން ކަސްޓަމަރ ކެއަރ އަށް ގުޅުމުން އަނެއްދުވަހު ވެމްކޯގެ ޚާއްސަ އީއާރް ޓީމުން ކުނިނަގަން ދާނެކަމަށް ވެމްކޯއިން ބުނެއެވެ.
ވެމްކޯއިން ބުނީ މާލޭގެ ކުނިނެގުމުގެ މަސައްކަތަކީ ގޮންޖެހުން ބޮޑު މަސައްކަތެއް ކަމަށެވެ. އެހެންކަމުން ، ލުއިފަސޭހަގޮތެއްގައި ޚިދުމަތް ފޯރުކޮށްދިނުމުގައި އާއްމުންގެ އެހީތެރިކަން ބޭނުންވާކަމަށް ވެމްކޯއިން ބުނެއެވެ.