ތިން މީހުނާއެކު، ހާލުގައި ޖެހިފައި އޮތް ޑިންގީއެއް ފެނިއްޖެ

އަރި އަތޮޅުގެ ހުޅަނގުން 60 ނޯޓިކަލް މޭލު ބޭރުން ތިން މީހުނާއެކު، ހާލުގައި ޖެހިފައި އޮތް ޑިންގީއެއް ފެނިއްޖެއެވެ.

އެމްއެންޑީއެފުން ބުނީ މި ޑިންގީގައި ތިބި ތިން މީހުންނަކީވެސް ބިދޭސީން ކަމަށެވެ. އަދި ކަނޑުމަތީގައި ގިނަ ދުވަސްތަކެއްވެ ކާބޯތަކެއްޗާއި ފެނަށް ޖެހުމުގެ ސަބަބުން މި ތިންމީހުންގެ ތެރެއިން އެކަކުގެ ހާލު ދެރަ ކަމަށާ ނަމަވެސް ބާކީ ތިބި ދެ މީހުންގެ ހާލު ރަނގަޅު ކަމަށެވެ.

މި ޑިންގީގައި ތިބި ތިން މީހުން މިރޭ 19:00 ހާއިރު ކޯސްޓްގާޑްގެ ލޯންޗަށް ނަގާފައިވާކަމަށާ މި މީހުން މާލެ ގެނެސް މޯލްޑިވްސް ޕޮލިސް ސަރވިސް އާ ހަވާލުކުރާ ގޮތަށް ހަމަޖެހިފައިވާކަމަށް އެމްއެންޑީއެފުން ބުނެއެވެ.

މި ހާދިސާގެ މަޢުލޫމާތު އެމްއެންޑީއެފް ކޯސްޓްގާޑްގެ މެރިޓައިމް ރެސްކިއު ކޯޑިނޭޝަން ސެންޓަރަށް ލިބިފައިވަނީ މިއަދު 14:04 ހާއިރުކަމަށް އެމްއެންޑީއެފުން ބުނެއެވެ. މި ޑިންގީ ފެނިގެން އެމްއެންޑީއެފް ކޯސްޓްގާޑަށް މަޢުލޫމާތު ދީފައިވަނީ އއ.ރަސްދޫ ރަންދުވެލި ނަމަކަށް ކިޔާ މަސްވެރިކަން ކުރާ ދޯންޏަކުންނެވެ. މި ހާދިސާގެ މަޢުލޫމާތު ލިބުމާއެކު އެމްއެންޑީއެފް ކޯސްޓްގާޑްގެ ފާސްޓް އިންޓަރސެޕްޓަރ ކްރާފްޓް ވެލާނާ އިން ވަގުތުން ހަރަކާތްތެރިވެފައިވާކަމަށް އެމްއެންޑީއެފުން ބުނެއެވެ.

މި މައްސަލަ މޯލްޑިވްސް ޕޮލިސް ސަރވިސްއިން ދަނީ އިތުރަށް ތަހުޤީގު ކުރަމުންނެވެ.