ކުޅުނު ދެ މެޗުން އެންމެ ޕޮއިންޓެއް ލިބި، ވަރލްޑް ކަޕުން ކެޓުމުގެ ބިރު ކުރިމަތުވެފައިވާ އާޖެންޓީނާގެ ކޯޗާއި ކުޅުންތެރިންނާ ބައްދަލުކުރަން ބޭނުންވާކަމަށް އެ ޤައުމުގެ ކުރީގެ ކެޕްޓަން ޑިއެގޯ މަރަޑޯނާ ބުނެފިއެވެ.
1986 ވަނަ އަހަރުގެ ވަރލްޑް ކަޕް އާޖެންޓީނާއަށް ކާމިޔާބުކޮށްދީ، އެ މުބާރާތުގެ މޮޅު ކުޅުންތެރިޔާގެ މަޤާމު ހޯދި މަރަޑޯނާ ބުނީ އޭނާއަށް ފުރުސަތު ލިބިއްޖެނަމަ ކުރީގެ ޓީމުގެ ކުޅުންތެރިން އެކުގައި ގެންދާނެ ކަމަށެވެ.
"އަހަރެން ބޭނުން ޓީމާ ބައްދަލުކުރަން. މި ޖަރޒީގައި ކުޅެ ކާމިޔާބު ހޯދާފައި ހުރި މީހަކަށް ކެތެއް ނުވާނެ މިހެން ބަލިވާތަން ބަލާކަށް. އެއީ ޖަރުމަނު ވިޔަސް، ބްރެޒިލް ވިޔަސް، ހޮލެންޑް ވިޔަސް އެކަން އޮންނާނެގޮތް. އަހަރުމެން މި މަސައްކަތް ކުރަނީ އަހަރުމެންގެ ޝަރަފު ނަގަހައްޓަން،" މަރަޑޯނާ ބުންޏެވެ.
އާޖެންޓީނާގެ ފުޓްބޯޅަ ފެޑަރޭޝަނަށް ވަރަށް ބޮޑަށް ފާޑުކިޔަމުން މަރަޑޯނާ ބުނީ އައިސްލޭންޑާއި ކްރޮއޭޝިޔާ އަތުން އާޖެންޓީނާ ބަލިވިއިރު ކުޅުންތެރިން ތިބީ ހަދާނެގޮތް ހުސްވެފައި ކަމަށެވެ. އަދި މިކަން ބަދަލު ކުރަން މިވަގުތު ޓީމަށް އެހީތެރިކަން ބޭނުންވާ ކަމަށެވެ.
ވޯލްޑް ކަޕުގެ ދެ ވަނަ ބުރަށްދާން މާދަމާރޭ އާޖެންޓީނާ ވާދަކުރާނީ ނައިޖީރިއާއާއެވެ. މި މެޗު ދެ ލަނޑުން ކާމިޔާބުކޮށްފިނަމަ ދެ ވަނަ ބުރަށް ދާނީ އާޖެންޓީނާއެވެ.