ކޮމިއުނިސްޓް ޕާޓީން ކޮރަޕްޝަން ނައްތާލުމަށް ކުރަމުންދާ މަސައްކަތްތައް ހުއްޓާނުލާނެކަމަށް ޝީ ވިދާޅުވެއްޖެ

ޗައިނާގައި ޒަމާނުއްސުރެ ހިންގަމުން އަންނަ ކޮރަޕްޝަންގެ ޢަމަލުތައް ނައްތާލުމަށް އެ ޤައުމުގެ ސަރުކާރުން ކުރަމުންދާ މަސައްކަތްތައް އަދި ހުއްޓުމަކަށް ގެންނަން ގާތްނުވާކަމަށް ޗައިނާގެ ރައީސް ޝީ ޖިންޕިންގް ވިދާޅުވެއްޖެއެވެ.

ބެއިޖިންގްގައި، ޗައިނާގެ ވެރިކަން ކުރާ ކޮމިއުނިސްޓް ޕާޓީގެ އިސް އޮފިޝަލުންނާ ބައްދަލުކުރައްވާ ވާހަކަ ދައްކަވަމުން ޝީ ވިދާޅުވީ، 2012 ވަނަ އަހަރު އެ ޤައުމުގައި ބޭއްވި، ވެރިކަން ކުރާ ޕާޓީގެ 18 ވަނަ ކޮންގްރެސްއަށް ފަހު، ޕާޓީގެ މެމްބަރުންގެ އުޅުމާއި މުޢާމަލާތްތައް ހަރުދަނާކުރުމަށް އަޅާފައިވާ ފިޔަވަޅުތަކުން ފާހަގަކުރެވޭ ނަތީޖާތައް ފެންނަމުންދާކަމަށެވެ.

އެހެންނަމަވެސް، މުޅި ކޮމިއުނިސްޓް ޕާޓީގެ ތެރެއިން ކޮރަޕްޝަން ނައްތާލުމުގައި އަދިވެސް ގިރާކުރަންޖެހޭ ގިނަ ހުރަސްތައް އެބަހުރި ކަމަށް ޗައިނާގެ ރައީސް ވިދާޅުވިއެވެ. ޝީ ވިދާޅުވީ، ޕާޓީގެ ތެރެއިން ކޮރަޕްޝަން ނައްތާލުމަށްޓަކައި ޕާޓީގެ މެމްބަރުން ތަމްރީނުކުރުމާއި މެމްބަރުންނަށް މަޤާމުގެ ކުރިއެރުން ދިނުމުގައި ގެންގުޅޭނެ އިންސާފުވެރި ނިޒާމެއް ޤާއިމުކުރުން މުހިއްމު ކަމަށެވެ.

މި ގޮތުން، މެމްބަރުންނަށް މަޤާމުގެ ކުރިއެރުން ދިނުމުގައި އެ މެމްބަރެއްގެ ވަނަވަރާއި ބެކްގްރައުންޑަށް އެކަނި ބެލުމުގެ ބަދަލުގައި، އޭނާގެ މަސައްކަތްތަކާއި މަސައްކަތުގައި އޭނާ ހޯދާފައިވާ ކުރިއެރުންތަކަށްވެސް ބަލަން ޖެހޭކަން ޝީ ވަނީ ފާހަގަކުރައްވާފައެވެ. ޗައިނާގެ ރިޔާސަތާ ޝީ ހަވާލުވެވަޑައިގެން ފަހުން އޭނާ ވަނީ ޕާޓީގެ އެތައް އިސް އޮފިޝަލުންނެއް މަޤާމުން ވަކިކުރައްވާފައެވެ.