ވަރލްޑް ކަޕް ކާމިޔާބުކުރި ފްރާންސްގެ ކުޅުންތެރިންނަށް ހާއްސަ އަނގޮޓިއެއް ތައްޔާރުކޮށްފިއެވެ.
އެމެރިކާގެ އަތްކަން ކުރާ މީހަކު މިއަނގޮޓި ތައްޔާރުކޮށް މުޅި ޓީމަށް ދޭން ނިންމީ ފްރާންސްގެ ފޯވަޑް އެންޓޮއިން ގްރިއެޒްމަން މިފަދަ އަނގޮޓިއެއް އޭނާއަށް ތައްޔާރުކޮށްދޭން އެދުމުންނެވެ.
އަލިމަހުން ހަދާފައިވާ މި އޮނގޮޓީގައި ވަނީ ދުނިޔޭގެ ޗެމްޕިއަން ޖަހައިފައެވެ. އަނގޮޓީގެ އަނގަމަތީގައި ވަނީ ފްރާންސްގެ ދިދަ އާއި އޭގެ މަތިން ފުޓްބޯޅަ ފެޑަރޭޝަނުގެ ލޯގޯ ފެންނަ ގޮތަށެވެ. އަދި އަނގޮޓީގެ ތިރީގައި ވަރލްޑް ކަޕުގެ ތަށި ވެސް ކަނޑާނަގާފައިވެ އެވެ.
ރަޝިޔާގައި ޖުލައި 15 ވަނަ ދުވަހު ނިމުނު ވޯލްޑް ކަޕް ފްރާންސް ކާމިޔާބު ކުރީ ކްރޮއޭޝިޔާ 4-2އިން ބަލިކޮށްފަ އެވެ. މިއީ ފްރާންސް ދުނިޔޭގެ އެންމެ ބޮޑު މުބާރާތް ކާމިޔާބުކުރި ދެ ވަނަ ފަހަރެވެ. އެންމެ ފުރަތަމަ ފްރާންސް ވޯލްޑް ކަޕް ކާމިޔާބު ކުރީ 1998 ވަނަ އަހަރު އެވެ. އެފަހަރު މުބާރާތް ބޭއްވީވެސް ފްރާންސްގަ އެވެ.