ކުރިއަށް އޮތް ސީޒަނާމެދު ލިވަޕޫލްގެ އުއްމީދުތައް މަތިވެރި ކަމަށާއި، ދެން އޮތީ ތަށި ހޯދުން ކަމަށް ކޯޗު ޔާގެން ކްލޮޕް ބުނެފި އެވެ.
އޭނާ މިހެން ބުނީ ފާއިތުވެދިޔަ އަހަރެއްހާ ދުވަހުގެ ތެރޭގައި ލިވަޕޫލުން ކުޅުންތެރިން ގަތުމަށް 250 މިލިއަން ޕައުންޑް ހަރަދުކޮށްފައިވާތީއެވެ. މީގެ ތެރޭގައި ޑިފެންޑަރަކާއި ގޯލްކީޕަރަކު ގަތުމަށް ހޭދަކޮށްފައިވަނީ ރެކޯޑް މިންވަރެކެވެ.
ބްރެޒިލްގެ ފިލިޕް ކުޓީނިއޯ ބާސެލޯނާއަށް 142 މިލިއަން ޕައުންޑަށް ވިއްކާލުމަށްފަހު ލިވަޕޫލުން ގަނެފައިވާ ކުޅުންތެރިންގެ ތެރޭގައި ޑިފެންޑަރު ނެދަލޭންޑްސްގެ ވާޖިލް ވެންޑައިކާއި ބްރެޒިލް ކީޕަރު އަލިސަން ބެކާ އާއި ފަބިއާނޯ އާއި ނަބީ ކެއިތާ އާއި ސްވިޒަލޭންޑްގެ ފޯވަޑް ޒެންޑެން ޝަގީރީ ހިމެނެއެވެ. ކްލޮޕް ބުނީ ލިވަޕޫލް ތަށި ހޯދަން ޖެހެނީ މިހެންވެ ކަމަށެވެ.
"އަހަންނަށް އެނގޭ މީހުން އެހެން އެބުނަނީ ކީއްވެކަން. ދެން އޮތީ އެކަން ކުރުން. އަހަރުމެން ރަނގަޅަށް ތައްޔާރުވާންޖެހޭނެ. އެހެން ޓީމުތައް ވެސް ވަނީ ޓްރާންސްފާގައި ރަނގަޅު ވިޔަފާރިތަކެއްކޮށްފައި. އެމީހުން ބައްޔެއްނުވާނެ،" ކްލޮޕް ބުންޏެވެ.
"އަހަންނަށް (ތަށި ހޯދާނެ ކަމުގެ) ޔަޤީންކަމެއް ނުދެވޭނެ ސީޒަން ނުފެށެނީސް. އަހަރުމެން ޖެހޭ ރަނގަޅަށް ތައްޔާރުވެ، ރަނގަޅު ނަތީޖާތަކެއް ހޯދަން. މިދިޔަ ސީޒަނުގައި ޓީމު ވަނީ ވަރަށް ބޮޑަށް ތައްޔާރުކުރެވިފައި،" ކޯޗު ބުންޏެވެ.
މީގެ ތިން ސީޒަނު ކުރިން ކްލޮޕް ހަވާޅުވި ފަހުން ލިވަޕޫލް ވަނީ ތިން ފައިނަލެއްގައި ކުޅެ ބަލިވެފައެވެ. އޭގެ ތެރޭގައި މިދިޔަ ސީޒަނުގެ ޗެމްޕިއަންސް ލީގު ވެސް ހިމެނެ އެވެ. ލިވަޕޫލް އެންމެ ފަހުން ތައްޓެއް ހޯދީ 2012 ވަނަ އަހަރު އެވެ.