ޕޯޗުގަލްގެ ކެޕްޓަން އަދި ދުނިޔޭގެ އެންމެ މޮޅު އެއް ކުޅުންތެރިޔާ ކްރިސްޓިއާނޯ ރޮނާލްޑޯ ޔުވެންޓަސްއާ ގުޅުމުން އެކުލަބަށް އެތައް ގޮތަކުން ދަތިތަކެއް ކުރިމަތިވާނެ ކަމަށް ކޯޗު މަސިމޯ އަލްގެރީ ބުނެފިއެވެ.
"މިހެންވީމަ އަހަރުމެންނާ ދެކޮޅަށް ކުޅެން އިދިކޮޅު ޓީމުތަކުން ކުރިއަށްވުރެ ފޯރިނަގާނެ. ކުރީ ސީޒަނަށް ވުރެ މި ސީޒަނުގައި ލީގު ކާމިޔާބުކުރަން އުނދަގޫވާނެ. ސަބަބަކީ އަހަރުމެންނަށް ލިބިފައިމިވަނީ ތަފާތު މޮޅު ކުޅުންތެރިއެއް. އެންމެނަށް ވެސް އޭނާގެ ފެންވަރު އެނގޭ،" ކޯޗު ބުންޏެވެ.
އަލެގްރީ ބުނީ ރޮނާލްޑޯގެ ސަބަބުން ކުލަބުގައި އުފެދިފައިވަނީ އާދަޔާ ހިލާފު ފޯރިއާއެއް ކަމަށެވެ.
"އަހަރުމެން އެންމެންވެސް މިތިބެނީ އާދަޔާ ހިލާފަށް އުފާވެފައި. ސަޕޯޓަރުންގެ އުއްމީދުތައް ވަރަށް ބޮޑު މިހާރު. އެއީ މާމޮޅު ކުޅުންތެރިއަކު ލިބުމުން. މިހެންވީމަ ކުޅުންތެރިން ވެސް މިތިބެނީ ކުރިއަށްވުރެ ބޮޑަށް އުފާވެފައި. މިއީ ލީގު ކާމިޔާބުކުރަން ބަލާއިރު ދިމާވާނެ މައްސަލައެއް،" ކޯޗު ބުންޏެވެ.
ރެއާލް މެޑްރިޑުގައި 9 އަހަރު ހޭދަ ކުރުމަށްފަހު ރޮނާލްޑޯ ޔުވެންޓަސްއާ ގުޅުނީ 112 މިލިއަން ޔޫރޯ އަށެވެ. މިއީ އޭނާ ގަތުމަށް ރެއާލް މެޑްރިޑުން 2009 ވަނަ އަހަރު މެންޗެސްޓާ ޔުނައިޓެޑަށް ދިން ވަރަށްވުރެ ބޮޑު ފީއެކެވެ. އުމުރުން މިހާރު 33 އަހަރުގެ ރޮނާލްޑޯ އަކީ ދުނިޔޭގެ އެންމެ މޮޅު ކުޅުންތެރިޔާގެ ރެކޯޑް އަދަދެއް ކަމަށްވާ ފަސް ފަހަރު ހޯދާ ފައިވާ ދެ ކުޅުންތެރިންގެތެރެއިން އެއް ކުޅުންތެރިޔާއެވެ. އޭނާ ގަތުމަށް ޔުވެންޓަސް ހޭދަކުރި ފައިސާ ވަނީ ހަމައެކަނި ޖަރޒީ ވިއްކައިގެން އެންމެ ހަފުތާއަކުން ހަމަކޮށްފަ އެވެ.