ނިއުރޭޑިއަންޓްގެ ޑިފެންޑަރު ރިލްވާން ވަހީދު (ކަކާރިލޭ) އޮމާނުގެ ކުލަބަކަށް ކުޅެން ފުރައިފިއެވެ.
ގާތްގަނޑަކަށް މަހަކު 5000 ޑޮލަރުގެ މުސާރައަކަށް ކުޅެން ރިލްވާން ފުރާފައިވާތީވެ ސާފް ޗެމްޕިއަންޝިޕަށް ދާ ޤައުމީ ސްކޮޑުގައި ވެސް އޭނާ ހިމަނާފައިނުވެއެވެ.
ރިލްވާން އަކީ ނިއުރޭޑިއަންޓްގެ ކޮންޓްރެކްޓްގައި ހުރި ކުޅުންތެރިއެކެވެ. އެކުލަބުން އޭނާ އަށް ރިލީޒްދިން ކަން އަދި ކަށަވަރެއްނުވެއެވެ.
އޮމާނުގެ ބައެއް ކުލަބުތަކަށް ކުޅެން ރިލްވާން ފުރުސަތު ހޯދީ އެ ޤައުމުގެ ބައެއް ކުލަބުތަކަށް ކޯޗުކޮށްދިން ނިއު އާއި ޤައުމީ ޓީމުގެ ކުރީގެ ކޯޗު ވެލީޒާ ޕޮޕޯފް އެހީތެރިވެދީންނެވެ.
ނިއު އާއި ވެލެންސިއާ އަދި ވިކްޓަރީ އާއި މާޒިޔާ އަށް ވެސް ކުޅުނު ރިލްވާނަކީ ރާއްޖޭގައި މިހާރު ހުރި އެންމެ ހުނަރުވެރި އެއް ކުޅުންތެރިޔާއެވެ. އޭނާ އަކީ ފަހަތާއި މެދުތެރެ އަދި ކުރިއަށް ވެސް އެއް ފެންވަރަކަށް ކުޅެވޭ ހަމައެކަނި ކުޅުންތެރިޔާއެވެ.