ސާފް ޗެމްޕިއަންޝިޕުގެ ތަށި އަލުން ރާއްޖެއަށް ހޯދައިދިނުމަށް މުބާރާތުގައި ވާދަކުރަން ތައްޔާރުވާ ކުޅުންތެރިންގެ ކިބައިން ކުރީގެ ކެޕްޓަން އަލީ އަޝްފާގް (ދަގަނޑޭ) އެދެފިއެވެ.
ރާއްޖޭގައި އުފެދުނު އަދި މި ސަރަހައްދުގެ ވެސް އެންމެ މޮޅު އެއް ކުޅުންތެރިޔާ އޭނާގެ ރަސްމީ ފޭސްބުކް ޕޭޖުގައި ބުނެފައިވަނީ "ސާފް ސުޒުކީ ކަޕުގައި ވާދަކުރާ ޤައުމީ ޓީމަށް ކާމިޔާބީއަށް އެދެން. އަލުން (ރާއްޖެ އަށް) ތަށި ގެނެސްދީ،" މިހެންނެވެ.
ރާއްޖެ މި މުބާރާތް ކާމިޔާބުކޮށްފައިވަނީ އެންމެ ފަހަރަކުއެވެ. އެއީ 2008 ވަނަ އަހަރު ރާއްޖެ އާއި ލަންކާ ގުޅިގެން ބޭއްވި މުބާރާތުގަ އެވެ. ދަގަނޑޭ އަކީ އެ ޓީމުގެ އެންމެ މުހިންމު ކުޅުންތެރިޔާއެވެ. އަދި އެ މުބާރާތުގެ އެންމެ މޮޅު ކުޅުންތެރިޔާ އަކީ ވެސް އޭނާއެވެ.
އަންނަ ސެޕްޓެމްބަރު ބަނގްލަދޭޝްގައި ފަށާ މުބާރާތަށް ޤައުމީ ކޯޗު ޕީޓަ ސެގްޓް އެކުލަވާލި ސްކޮޑުގައި ދަގަނޑޭ ހިމަނާފައިނުވެއެވެ. އޭނާ އާއި އެފްއޭއެމާ ދެމެދު ހިޔާލުތަފާތުވުންތަކެއް އުޅޭއިރު ކޯޗާ ވެސް ހިޔާލުތަފާތުވުންތަކެއް އެބަހުއްޓެވެ.
ދަގަނޑޭ ޤައުމީ ޓީމުން ބާކީ ކުރީ ވަރލްޑް ކަޕް ކޮލިފައިންގައި މި އަހަރުގެ ކުރީ ކޮޅު ބޫޓާނާ ދެކޮޅަށް ކުޅެން އޮތް މެޗުގެ ކުރިންނެވެ. އިތުބާރު ހުރި ގޮތަކަށް އެނގިފައިވާ ގޮތުގައި ތަފާތު ސަބަބުތަކާހުރެ ސާފް ޗެމްޕިއަންޝިޕް ސްކޮޑަށް އޭނާއަށް ދިން ދައުވަތު ވަނީ ޤަބޫލުނުކޮށްފައެވެ.