އައްޑޫސިޓީން ވިޔަފާރި ބޭނުމަށް ބިން ދޫކުރަން ހުޅުވާލައިފި

އައްޑޫސިޓީގައި ވިޔަފާރި ބޭނުމަށް ކުއްޔަށް ދޫކުރާ 68 ބިމަކަށް، ކުރިމަތި ލުމުގެ ފުރުސަތު ހައުސިންގ މިނިސްޓްރީން ހުޅުވާލައިފިއެވެ.

ހައުސިންގ މިނިސްޓްރީން ހުޅުވާލި މި ފުރުސަތުގައި މުޅި އައްޑޫސިޓީގެ 6 އަވަށަކުން 68 ބިމަކަށް ކުރިމަތިލުމުގެ ފުރުސަތު ވަނީ ހުޅުވާލާފައެވެ. އަވަށްތަކުން ބިންތައް ދޫކުރުމަށް ހަމަޖެހިފައިވަނީ 4 ޒޯނަކުންނެވެ. އެއީ ބަންދަރު ސަރަޙައްދާއި، އީ.ސީ.ސީ ހޮސްޕިޓަލް ސަރަޙައްދާއި، ލިންކްރޯޑު ނުވަތަ ޕްރައިމަރީ މަގުތަކާއި، އަދި މީހުންދިރިއުޅޭ ސަރަޙައްދު ތަކުންނެވެ.

އެންމެ ގިނަ ބިން ވިޔަފާރި ބޭނުމަށް ދޫކުރަން ހަމަޖެހިފައިވަނީ ފޭދޫންނެވެ. އެގޮތުން ފޭދޫން 1 ހާސް އަކަފޫޓާއި 1500 އަކަފޫޓާ ދެމެދުގެ 25 ބިން ކުއްޔަށް ދިނުމަށް ވަނީ ނިންމާފައެވެ. ދެން އެންމެ ގިނަ ބިން ދޫކުރުމަށް ހަމަޖެހިފައިވަނީ ހިތަދޫންނެވެ. އެގޮތުން ހިތަދޫން 1 ހާސް 8 ސަތޭކަ އަކަފޫޓާއި 2 ހާސް 9 ސަތޭކަ އަކަފޫޓާ ދެމެދުގެ 14 ބިމެއް ކުއްޔަށް ދޫކުރުމަށް ވަނީ ހަމަޖެހިފައެވެ. މީދޫ އަދި މަރަދޫން ދޫކުރުމަށް ހަމަޖެހިފައިވަނީ، އެއިން ކޮންމެ އަވަށަކުން 6 ބިމެވެ. މަރަދޫން ކުއްޔަށް ދޫކުރަނީ 1 ހާސް އަކަފޫޓުގެ ބިންތަކެކެވެ. އަދި މީދޫން ދޫކުރުމަށް ހަމަޖެހިފައިވަނީ 3 ހާސް އަކަފޫޓޫގެ ބިންތަކެކެވެ. މަރަދޫފޭދޫން 1 ހާސް އަކަފޫޓާއި 1200 އަކަފޫޓުގެ 10 ބިން ދޫކުރުމަށް ވަނީ ހަމަޖެހިފައެވެ. މީގެ އިތުރުން ހުޅުދޫއިން 2 ހާސް އަކަފޫޓާއި 3 ހާސް އަކަފޫޓުގެ 7 ބިން ދޫކުރާނެއެވެ.

ހައުސިންގ މިނިސްޓްރީން މިކަމާ ގުޅިގެން ނެރުނު އިޢުލާނުގެ ބުނެފައިވަނީ މި ބިންތަކަށް ކުރިމަތި ލެވޭނީ އައްޑޫސިޓީގެ ރައްޔިތުންނަށް ކަމަށެވެ. ބިންތައް ދިނުމުގައި މައިގަނޑު ގޮތެއްގައި ބަލަނީ ހުށައަޅާ އަގަށާއި އަދި ޕްރޮޕޯސަލް އަށެވެ. ކުއްޔަށް ދޫކުރާ ބިންތަކުގައި ޢިމާރާތްކުރެވޭނެ އެންމެ އުސް މިނަކީ 2 ފަންގިފިލާއެވެ. އަދި މި ބިންތައް ކުއްޔަށް ދޫކުރަނީ 5 އަހަރުގެ މުއްދަތަކަށެވެ.

ބިންތަކަށް ކުރިމަތިލުމަށް ހުށައަޅާ ފޯމު އައްޑޫސިޓީގެ އަވައްތަކުގައި ޤާއިމު ކޮށްފައިވާ ހައުސިންގ މިނިސްޓްރީގެ ގޮފިތަކުން ލިބެން ހުންނާނެއެވެ. އަދި ފޯމް ހުށައެޅުމުގެ ފުރުޞަތު މިމަހުގެ 12 ވަނަ ދުވަހާ ހަމައަށް ވަނީ ހުޅުވާލާފައެވެ.