ވަރލްޑް ކަޕުގައި މޮޅަށް ކުޅެ، ތިން ލަނޑު ޖެހި ކޮލަމްބިއާގެ ޑިފެންޑަރު ޔެރީ މިނާގެ ކުރިމަގާމެދު ގޮތެއް ނިންމާނީ ބާސެލޯނާގެ ކޯޗު އާނެސްޓާ ވަލްވާޑޭ ކަމަށް އެކުލަބުން ބުނެފިއެވެ.
ބާސެލޯނާގެ ނާއިބް ރައީސް ޖޯޑީ މެސްޓްރޭ މިހެން ބުނީ މިނާ ހޯދުމަށް މެންޗެސްޓާ ޔުނައިޓެޑާއެކު އިނގިރޭސި ކުލަބުތަކުން ޝައުގުވެރިކަން ފާޅު ކުރަމުންދާތީއެވެ.
"އެއީ ވަރަށް ބޮޑު ސިއްރެއް (މެންޗެސްޓާ ޔުނައިޓެޑުން މިނާ ގަތުމަށް ބިޑްކޮށްފައިވާކަން ހާމަކުރުން). އޭނާއަށް ގިނަ ކުލަބުތަކުން ޝައުގުވެރިވޭ. އޮފާތައް އެބަހުރި. އެކަމަކު އަހަރުމެން ވަރަށް ފަރުވާތެރިވާންޖެހޭ ކުޅުންތެރިއެއް އޭނާއަކީ. އޭނާ ބާސެލޯނާއަށް އައީ މިދިޔަ ސީޒަނުގައި. އޭނާ ވަރލްޑް ކަޕުގައި މޮޅަށް ކުޅުނު. އެކަމަކު އެންމެ ފަހުގެ ގޮތް ނިންމާނީ ކޯޗު،" ޖޯޑީ ބުންޏެވެ.
ބާސެލޯނާގައި މިހާރު ސެންޓް ބެކަށް ކުޅޭ ހަ ކުޅުންތެރިން އެބަތިއްބެވެ. އެއީ ފްރާންސްގެ ސެމިއުލް އުމްޓީޓީ އާއި ސްޕޭނުގެ ޖެރާޑް ޕީކޭ އާއި އަލަށް ޓީމާ ގުޅުނު ކްލެމެންޓް ލެންގްލެޓްގެ އިތުރުން މިނާ އާއި މާލޮން ސަންޓޯސް އާއި ބެލްޖިއަމްގެ ތޯމަސް ވާލަމަންއެވެ.
މިހާ ގިނަ ކުޅުންތެރިން ތިބިއިރު ވަލްވާޑޭ ވަނީ މިނާގެ ޑިފެންސިވް ކުޅުން ރަނގަޅު ކުރަންޖެހޭ ކަމަށް ބުނެފައެވެ. މިއީ ކޯޗުގެ ގޭމްޕްލޭނުގައި މިނާ ނުހިމެނޭ ކަމުގެ އިޝާރާތެއް ކަމަށް ގިނަ ބަޔަކު ސިފަކުރެއެވެ.
"އޭނާ އަކީ މޮޅު ކުޅުންތެރިއެއް. ވަރލްޑް ކަޕުގައި ރަނގަޅަށް ކުޅުނު. ހާއްސަކޮށް އޭނާ ގޯލު ޖެހި. އޭނާ އަކީ ގޯލް ޖަހާނެ މީހެއްކަން މިވަނީ ސާބިތުކޮށްދީފައި. ޤައުމީ ޓީމުން ފަހަރެއްގައި ބޭނުންވެދާނެ ކުޅުންތެރިން ޑިފެންސަށްވުރެ ބޮޑަށް ގޯލު ޖަހަން. އެކަމަކު އަހަރުމެން ބޭނުންވޭ ދެ ކަންތައްވެސް ކުރަން. އެއީ އަހަރެން ވެސް ޝައުގުވެރިވި ކަމެއް. އެކަމަކު އޭނާ އެބަޖެހޭ ޑިފެންސް ކުރަން. އެއީ ކޮންމެހެން ވެސް ކުރަންޖެހޭ ކަމެއް. އަހަރުމެން ޓީމުގައި ގޯލު ޖަހާނެ މީހުން އެބަތިބި،" ވަލްވާޑޭ ބުންޏެވެ.