ރެއާލް މެޑްރިޑަށް ބަދަލުވާން ބޭނުންވެފައި ހުރި ޗެލްސީގެ ގޯލްކީޕަރު ތިބައޫ ކޯޓުއާ ޕްރެކްޓިހަށް ނުނުކުންނަން ފަށައިފިއެވެ.
ޗެލްސީގެ ކޯޗު މައުރީޒިއޯ ސަރީ ބުނީ އޭނާގެ ކީޕަރު އަލުން ޕްރެކްޓިހަށް ނުކުންނާނެ ކަމާމެދު ޝައްކު ކަމަށެވެ.
"މިވަގުތު ކޯޓުއާ އަކީ ޗެލްސީގެ ކީޕަރު. އެކަމަކު އޭނާގެ ކުރިމަގާމެދު ވަކި އެއްޗެއް ބުނަން ދަތި،" ސަރީ ބުންޏެވެ.
މި ސީޒަނުގައި ޗެލްސީއާ އަލަށް ގުޅުނު ކޯޗު ވަނީ ކޯޓުއާ ރެއާލް މެޑްރިޑަށް ދާން ދޫކޮށްލަން އޭނާގެ އެޖެންޓް އެދިފައިވީ ނަމަވެސް ކުޅުންތެރިޔާގެ ވިސްނުން ހުރި ގޮތް ބަލަން ބޭނުންވާ ކަމަށް ބުނެފައެވެ. ކޯޓުއާ ޕްރެކްޓިހަށް ނުކުތުން ހުއްޓާލީ ކޯޗު މިހެން ބުނިތާ އެއް ދުވަސް ފަހުންނެވެ.
"އެޖެންޓަށް އަހަރެން އިތުބާރު ނުކުރަން. އަހަރެން ބޭނުންވޭ ކުޅުންތެރިޔާ ސީދާ ވާހަކަ ދައްކަން. ކުޅުންތެރިޔާ ދާން ބޭނުންކަމަށް ބުނެފިއްޔާ ދެން ކުރާނެ ކަމެއްނެތް. އަހަރެން އުއްމީދު ކުރަނީ ކޯޓުއާ މަޑުކުރާނެ ކަމަށް،" ސަރީ ބުންޏެވެ.
މިދިޔަ މަހު ނިމުނު ވަރލްޑް ކަޕުގެ އެންމެ މޮޅު ކީޕަރުގެ މަޤާމު ހޯދި ކޯޓުއާ މެޑްރިޑަށް ދާން ބޭނުންވަނީ އޭނާގެ ކުދިންނާ ގާތުގައި ހުރުމަށް ބޭނުންވާތީއެވެ. ކުރީގެ ލޯބިވެރިޔާ އަށް ލިބިފައިވާ ދެ ކުދިން އުޅެނީ މަންމަގެ ޤައުމު ކަމަށްވާ ސްޕޭނުގައެވެ.
ކޯޓުއާ އަކީ ޗެލްސީން ލޯނު އުސޫލުން ދޫކޮށްލުމުން ސްޕޭނުގެ އެތްލެޓިކޯ މެޑްރިޑަށް ތިން އަހަރު ކުޅުނު ކީޕަރެކެވެ. އޭނާ ޗެލްސީއަށް ބަދަލުވީ މީގެ ތިން އަހަރު ކުރިންނެވެ. މިހާތަނަށް ޗެލްސީ އަށް ކުޅެދިން 154 މެޗުގައި އޭނާ ކޮޅަށް 151 ގޯލު ވަދެފައިވެއެވެ. ބައިކޮޅަށް ގޯލެއް ނުވައްދައި އޭނާ ބަލަހައްޓާފައިވަނީ އެންމެ 58 މެޗެވެ.