މޮޅަކުން އިނގިރޭސި ޕްރެމިއާ ލީގު މާދަމާ ރޭ ފެށުމަކީ ވަރަށް ބޮޑު އަމާޒެއް ކަމަށް އާސެނަލްގެ ކޯޗު އުނާއީ އެމެރޭ ބުނެފިއެވެ.
މިއީ 22 އަހަރަށް ފަހު ކޯޗު ކަމުން އާސެން ވެންގާ ވަކިވުމަށްފަހު އާސެނަލް އާ ކޯޗަކާއެކު ކުޅޭ ފުރަތަމަ މެޗެވެ. އާސެނަލްގެ އެމިރޭޓްސް ސްޓޭޑިއަމުގައި މި މެޗުގައި އިދިކޮޅުން ކުޅޭނީ އެންމެ ފަހުގެ ޗެމްޕިއަން މެންޗެސްޓާ ސިޓީއެވެ.
"އަހަރުމެން ވަރަށް ބޮޑަށް ބޭނުންވެފައި މިތިބީ މޮޅަކުން ފަށަން. ރަނގަޅު ފެށުމެއް ވަރަށް މުހިންމު. އެކަމަކު ސިޓީއާ ބެހޭ ގޮތުން ވާހަކަ ދެއްކުމަކީ ފަސޭހަ ކަމެއް. ދަނޑުމަތީގައި އެމީހުންނާ ދެކޮޅަށް ކުޅުމަކީ ވަރަށް އުނދަގޫ ކަމެއް،" އެމެރޭ ބުންޏެވެ.
އޭނާ ބުނީ ބާސެލޯނާ އާއި ބަޔާން މިއުނިކްގެ ކުރީގެ ކޯޗު ޕެޕް ގާޑިއޯލާގެ އިރުޝާދުގެ ދަށުން ފާއިތުވެދިޔަ ދެ އަހަރު ސިޓީ ވަނީ ވަރަށް ބޮޑަށް ކުރިއަރާފައި ކަމަށެވެ.
"ވަރަށް ބޮޑަށް ތަރައްގީވެފައިވާ ޓީމެއް އެއީ. އެކުގައި ދެ އަހަރު މަސައްކަތްކޮށް އެކަކު އަނެކަކު ވަރަށް ފަރިތަ ޓީމެއް އެއީ. މިފަދަ ސަބަބުތަކާހުރެ އެމީހުން ބަލިކުރަން ވަރަށް އުނދަގޫވާނެ،" އެމެރޭ ބުންޏެވެ.