އިނގިރޭސި ޕްރެމިއާ ލީގުގެ ތަށީ ދިފާއު ކުރަން ނުކުންނައިރު އެންމެ މުހިންމު ކަމަކީ ހުސްވި ސީޒަނުގައި ކުރި ކަންތައްތައް ހަނދާނުގައި ބެހެއްޓުން ކަމަށް މެންޗެސްޓާ ސިޓީން ބުނެފި އެވެ.
ކޯޗު ޕެޕް ގާޑިއޯލާ މިހެން ބުނީ ސީޒަނުގެ ފުރަތަމަ މެޗުގައި މިރޭ އާސެނަލްއާ ދެކޮޅަށް ކުޅޭ މެޗުގެ ކުރިންނެވެ.
"ބައެއް މީހުން ބުނޭ މިދިޔަ ސީޒަން މަތިން ހަނދާން ނައްތާލަންވީއޭ. އެކަމަކު އަހަރެން އެކަމާ ދެކޮޅު. އަހަރެން ގަބޫލުކުރާ ގޮތުގައި މިދިޔަ ސީޒަނުގައި އަހަރުމެން ކުރި ކަންތައްތަކާއި ދިމާވި ހުރިހާ ކަމެއް އަހަރުމެންގެ ހަނދާނުގައި ހުންނަންޖެހޭނެ. އެއިރުން ކާމިޔާބު ހޯދަން ފަސޭހަވާނެ،" ކޯޗު ބުންޏެވެ.
ޖުމުލަ 100 ޕޮއިންޓާއެކު މިދިޔަ ސީޒަނުގައި ޗެމްޕިއަންކަން ހޯދި ޓީމުގެ ކޯޗު ބުނީ މިދިޔަ ސީޒަނުގެ ހުރިހާ ކާމިޔާބީއެއް ހޯދުމަކީ ދަތިކަމަކަށްވާނެ ކަމަށެވެ.
"އަހަރުމެން ކުރި ހުރިހާ ކަމެއް ނުވެދާނެ. އެމަކަކު އުއްމީދަކީ މިދިޔަ ސީޒަނުގައި ނުކުރެވުނު ކަންތައްތައް މިފަހަރު ކުރުން،" ގާޑިއޯލާ ބުންޏެވެ.
އޭނާ އިޝާރާތް ކުރީ މިދިޔަ ސީޒަނުގައި ކާމިޔާބު ނުކުރެވުނު މުބާރާތްތަކަށެވެ. ސިޓީ ވަނީ މި ސީޒަން ފެށުމުގެ ކުރިން ކުޅުނު ކޮމިއުނިޓީ ޝީލްޑް ކާމިޔާބުކޮށް، އައްޑަނަ އުފުލާލައިފަ އެވެ. ގާޑިއޯލާ ބުނީ އެއީ އެންމެ މެޗެއް ނަމަވެސް އެއީ ފައިނަލެއް ކަމަށާއި މިހެންވެ ކޮންމެ ކާމިޔާބީއަކީ ވެސް މުހިންމު އެއްޗެއް ކަމަށެވެ.