ކުލަބު ފުޓްބޯޅައަށް ހުސްވުމަށް، ބާސެލޯނާގެ ސްޕޭން ޑިފެންޑަރު ޖެރާޑް ޕީކޭ ގައުމީ ޓީމަށް ކުޅުން ހުއްޓާލައިފިއެވެ.
އުމުރުން 31 އަހަރުގެ ޕީކޭ ވަނީ މިހާތަނަށް ގައުމީ ޓީމަށް 102 މެޗު ކުޅެދީ ވަރލްޑް ކަޕް އެއްފަހަރު އަދި ޔޫރޯ ދެ ފަހަރު ކާމިޔާބުކޮށްދީފައެވެ. އޭނާ އަކީ 2010 ވަނަ އަހަރުގެ ވަރލްޑް ކަޕް ކާމިޔާބުކުރި ސްޕޭން ޓީމުގައި ކުޅުނު ކުޅުންތެރިންގެ ތެރެއިން ޤައުމީ ޓީމުން ރިޓަޔާކުރި އެންމެ ފަހު ކުޅުންތެރިޔާވެސްމެއެވެ.
ޕީކޭ ޤައުމީ ޓީމަށް ކުޅުން ހުއްޓާލީ ސްޕޭނުން ވަކިވެ، ބާސެލޯނާ ނިސްބަތްވާ ކެޓަލޯނިއާ މިނިވަން ދައުލަކަށްވުމަށް ކުރާ ކެމްޕޭނުގައި ބައިވެރިވާތީ އޭނާއަށް ސަޕޯޓަރުންގެ ނުރުހުންވެސް އަމާޒުވެފައިވަނިކޮށެވެ. ނަމަވެސް ޤައުމީ ޓީމާ އަލަށް ހަވާލުވި ބާސެލޯނާގެ ކުރީގެ ކޯޗު ލުއިސް އެންރީކޭ ހުރީ ޕީކޭ ޤައުމީ ޓީމުގައި ބަހައްޓަން ބޭނުންވެފައެވެ.
"އަހަރެން އޭނާއާ މީގެ ހަފުތާއެއް ނޫނީ ދެ ހަފުތާ ކުރިން ވާހަކަ ދެއްކިން. އަހަރެން ބުނިން މި ނިންމުމަކީ ވަރަށް ކުރިން ނިންމާފައިވާ ނިންމުމެއްކަމަށް. އަހަރެން މިހާރު ބޭނުންވަނީ ބާސެލޯނާއަށް ހުސްވާން. އަހަރެންގެ ކޮންޓްރެކްޓްގައި އަދި ބާކީ ތިން އަހަރު އެބައޮތް. ފަހަރުގައި އިތުރު މުއްދަތު ވެސް ލިބިދާނެ،" ޕީކޭ ބުންޏެވެ.
އޭނާ ބުނީ ސްޕޭނަށް ވޯލްޑް ކަޕް ކާމިޔާބު ކޮށްދިނުމަކީ ވަރަށް ބޮޑު އުފަލެއް ކަމަށެވެ.