ސްޕޭނުގެ ޤައުމީ ޓީމަށް ކުޅުން ޑޭވިޑް ސިލްވާ ހުއްޓާލައިފިއެވެ.
މެންޗެސްޓާ ސިޓީގެ މިޑްފީލްޑަރު، ސިލްވާ އަކީ 2008ގެ ޔޫރޯ އާއި 2010ގެ ވަރލްޑް ކަޕް އަދި 2012 ވަނަ އަހަރުގެ ޔޫރޯ ކާމިޔާބުކުރި ސްޕޭން ޓީމުގެ މުހިންމު ކުޅުންތެރިއެކެވެ. އުމުރުން 32 އަހަރުގައި އޭނާ ޤައުމީ ޓީމަށް ކުޅުން ހުއްޓާލިއިރު 2006 އިން ފެށިގެން ވަނީ 125 މެޗު ކުޅެފައެވެ.
"މި ޖުމުލަތަކަކީ އެހާ ފަސޭހަ ޖުމުލަތަކެއްނޫން ލިޔަން. އަހަރެން ޤައުމީ ޓީމާއެކު ވަރަށް އުފާވެރި ތަޖުރިބާތަކެއްކުރިން. އެހނަދާންތައް އަބަދުވެސް ހުންނާނެ. ވަރަށް ގިނަ ދުވަހު ވިސްނުމަށްފަހު ކުޅުން ހުއްޓާލަން ނިންމީ،" ސިލްވާގެ ބަޔާނުގައި ބުނެފައިވެއެވެ.
އޭނާ ބުނީ ސްޕޭނުގެ ޤައުމީ ޓީމަށް ކުޅުމަކީ ކުޅުންތެރިއެއްގެ ގޮތުގަ އާއި އަމިއްލަ ޒާތީ ދިރިއުޅުމުގައި ވެސް ހަރުދަނާ މީހަކަށްވާން އޭނާ އަށް ލިބިގެންދިޔަ ވަރަށް ރަނގަޅު ފުރުސަތެއް ކަމަށެވެ.
ސިލްވާ ކުޅުން ހުއްޓާލިއިރު އޭނާއާއެކު ޤައުމީ ޓީމުގައި ޔޫރޯ އާއި ވަރލްޑް ކަޕް ކާމިޔާބުކުރި ބާސެލޯނާގެ ޑިފެންޑަރު ޖެރާޑް ޕީކޭ ވެސް ވަނީ މިދިޔަ ހަފުތާގައި ޤައުމީ ޓީމަށް ކުޅުން ހުއްޓާލައިފައެވެ.