ލިވަޕޫލުން ބްރެޒިލްގެ ފިލިޕް ކުޓީނިއޯ ގެންދިޔަ ގޮތަށް މެންޗެސްޓާ ޔުނައިޓެޑުން ޕައުލް ޕޮގްބާ ގަތުމަށްވެސް ބާސެލޯނާއިން މަސައްކަތް ފަށައިފިއެވެ.
ސްޕޭނުގެ ނޫސްތަކުން މިފަދައިން ބުނީ ބާސެލޯނާއަށް ބަދަލުވާން ބޭނުންވާ ކަމަށް ނުސީދާކޮށް ޕޮގްބާ އިޝާރާތްކޮށްފައިވަނިކޮށެވެ. ފްރާންސަށް ވަރލްޑް ކަޕް ކާމިޔާބުކޮށްދިން ކުޅުންތެރިޔާ ވަނީ ހިތްހަމަޖެހިގެން ހުރެ ނޫނީ މޮޅު ކުޅުމެއް ނުދެއްކޭނެ ކަމަށް ބުނެފައެވެ.
ބާސެލޯނާގެ ރައީސް ޖޯސެޕް މާރިއޯ ބާޓޮމެއު ޕޮގްބާއާ ބެހޭ ގޮތުން ވާހަކަ ދެއްކީ ނުސީދާކޮށެވެ.
"ތިބުނާ ކުޅުންތެރިޔާ އަކީ އެހެން ކުލަބެއްގެ ކުޅުންތެރިއެއް. އެކަމަކު ޓްރާންސްފާ މާކެޓުގައި އަދި ބާކީ 20 ދުވަސް އެބައޮތް. އެހެންވީމާ އަދި ވާގޮތެއް ބަލަންތިބޭ. ޓްރާންސްފާ މާކެޓް ނިމުނީމަ އެނގޭނީ ކޮންބައެއްތޯ ކުލަބުން ދިޔައީ އަދި ކޮންބައެއްތޯ ކުލަބަށް ގެނައީ. އަހަރުމެން މިދަނީ އަހަރުމެން ބޭނުންވާ ކުޅުންތެރިންނާ ވާހަކަ ދައްކަމުން،" ބާސާގެ ރައީސް ބުންޏެވެ.
އޭނާ ބުނީ ޓްރާންސްފާގެ ކަންކަމުގައި އެންމެ އިސްކޮށް އުޅެނީ ޓެކްނިކަލް ޑައިރެކްޓަރު އެރިކް އަބީދާލް ކަމަށާއި، ބާސެލޯނާ އިން އާ ކުޅުންތެރިން ފެނިގެންދާނެ ކަމަށެވެ.
މި ސީޒަނަށް ބާސެލޯނާއިން މިހާތަނަށް ވަނީ ފަސް ކުޅުންތެރިއަކު ގެނެސް ތިން ކުޅުންތެރިއަކު ވިއްކާލައިފައެވެ.