ޔަމަނުގެ އިޤްތިޞާދަށް ކުރިމަތިވެފައިވާ ހީނަރުކަމުގެ ސަބަބުން އެ ޤައުމުގެ ދެކުނުގައި ކުރަމުންދާ ވަރުގަދަ މުޒާހަރާތައް އެ ސަރަހައްދުގެ އިތުރު ރަށްތަކަށް ފެތުރިއްޖެއެވެ.
ރޮއިޓަރސްއިން ބުނެފައިވަނީ ޔަމަނުގެ ސަރުކާރުން ވެރިކަން ކުރަމުންދާ އެ ޤައުމުގެ ދެކުނުގެ ރަށެއް ކަމަށްވާ އަދަންގެ އިތުރުން އެހެން ސަރަހައްދުތަކުގައިވެސް ވަރުގަދަ މުޒާހަރާތައް ކުރަމުންދާކަމަށެވެ. މުޒާހަރާގެ ބައިވެރިން ވަނީ، ޔަމަނުގެ ފައިސާ، ޔަމަން ރިއާލްގެ އަގުތަކަށް އައިސްފައިވާ ބޮޑެތި ބަދަލުތަކުގެ ސަބަބުން އިޤްތިޞާދަށް ކުރިމަތިވެފައިވާ މައްސަލަތައް ހައްލުކުރުމަށް ސަރުކާރަށް ގޮވާލާފައެވެ.
މި އަހަރުގެ ޖެނުއަރީ މަހު އެމެރިކާ ޑޮލަރަކަށް ވަނީ ޔަމަނުގެ ފަސް ސަތޭކައެއްހާ ރިއާލެވެ. ޔަމަނުގެ ބޭންކުތަކުން ބުނެފައިވަނީ ހޯމަ ދުވަހު މި ޢަދަދު ހަ ސަތޭކަ ފަންސާސް ރިއާލަށް އުފުލިފައިވާކަމަށެވެ.
މިދިޔަ އަހަރު މިއަދަދު އުޅުނީ ދުއިސައްތަ ފަންސާސް ރިއާލްގައި ކަމަށް ވެސް އެ ފަރާތްތަކުން ބުނެއެވެ. ޔަމަނުގެ އިޤްތިޞާދާ ބެހޭ ގޮތުން އުފެދިފައިވާ ނުތަނަވަސްކަން ދުރުކުރުމަށް އެ ޤައުމުގެ ސަރުކާރު ވަނީ ފިޔަވަޅުތަކެއް އަޅާފައެވެ. މި ގޮތުން އެއް ޤައުމުގައި ދުއްވާ އުޅަނދު އެތެރެ ކުރުން ހުއްޓާލުމުގެ އިތުރުން ސަރުކާރުގެ މުވައްޒަފުންގެ މުސާރަވެސް ވަނީ ބޮޑުކޮށްފައެވެ.