ބައިކް މޯލްޑިވްސްއިން ބޭއްވި ބައިކް ޗެމްޕިއަންޝިޕްގެ ދެވަނަ މުބާރާތް އަށްޑިހަ ހަތަރު ބައިވެރިންނާއެކު ނިންމާލާއިފިއެވެ.
ދެދުވަހުގެ މުއްދަތަކަށް ކުރިއަށްގެންދިޔަ މިމުބާރާތުގެ ނަތީޖާ ފާޅުކޮށް ވަނަ ވަނައަށް ދިޔަ ބައިވެރިންނަށް ތައްޓާ ހަނދާނީ ލިޔުން ދީފައިވާއިރު އަންހެނުންގެ ބައިން މުޅި މުބާރާތުން އެއްވަނަ ބައިސްކަލް ދުއްވުންތެރިޔާ ގެ މަޤާމް ހޯދާފައިވަނީ ޒުލްފާ އަލީއެވެ. އަދި މުޅި މުބާރާތުން އެއް ވަނަ ފިރިހެން ބައިސްކަލު ދުއްވުންތެރިޔާގެ މަޤާމް ހޯދާފައިވަނީ އިބްރާހީމް ތައުފީޤެވެ. މީގެ އިތުރުން މުބާރާތުގައި ބައިވެރިވި ޓީމްތަކުގެ ތެރެއިން ފިރިހެނުންގެ ބައިން އެއްވަނަ ޓީމަކަށް ހޮވިފައިވަނީ އެމް.އެސް. ސްޕޯޓްސް އެކަޑަމީއެވެ. އަދި އަންހެން ޓީމްތަކުން އެއްވަނަ ޓީމަކަށް ހޮވުނީ ޔުނައިޓެޑް ޑިވެލޮޕްމަންޓެވެ.
އަންހެނުންގެ ބަޔާއި ފިރިހެނުންގެ ބައިން އެކި ކެޓަގަރީތަކުގައި ވާދަކޮށްފައިވާއިރު މިމުބާރާތުގައި އަށްޑިހަ ހަތަރު ބައިންވެރިން ބައިވެރިވެފައިވެއެވެ. މުބާރާތުގައި ޓީމްތަކަށް ބައިވެރިވުމުގެ ފުރުސަތު ހުޅުވާލުމުން ނުވަ ޓީމަކުން ބައިވެރިވެ މުބާރާތުގައި ވާދަކޮށްފައިވެއެވެ.
މީގެ ފަނަރަ އަހަރު ކުރިން ރާއްޖޭގައި ބައިސްކަލު ދުއްވުމުގެ މުބާރާތެއް ބާއްވާފައިވާއިރު މިއީ އޭގެ ފަހުން ރާއްޖޭގައި ބައިސްކަލު މުބާރާތެއް ބޭއްވި ދެވަނަ ފަހަރެވެ. ބައިކް މޯލްޑިވްސްއިން އިންތިޒާމްކޮށްގެން ބައިކް ޗެމްޕިއަންޝިޕެއް އެންމެ ފުރަތަމަ ބާއްވާފައިވަނީ މިދިޔަ އަހަރެވެ.
ބައިކް މޯލްޑިވްސް އަކީ ދުޅަހެޔޮ ސިއްޙަތެއްގައި ތިބުމައްޓަކައި ދިވެހިންގެ ތެރޭގައި ބައިސްކަލް އާންމުކުރުމާއި، ތިމާވެއްޓަށް ކުރާ ނޭދެވޭ އަސަރުތައް ކުޑަކުރުމަށް ހޭލުންތެރިކަން އިތުރުކުރުމައް އުފައްދާފައިވާ ހިލޭ ސާބަހަށް މަސައްކަތްކުރާ ޖަމިއްޔާއެކެވެ. ދުއިސައްތައެއްހާ މެންބަރުން ރަޖިސްޓްރީވެފައިވާ ބައިކް މޯލްޑިވްސްގެ ހަރަކާތްތައް އިތުރުކޮށް ފުޅާކުރުމުގެ ގޮތުން ރާއްޖެއާއި ރާއްޖެއިން ބޭރުގައިވެސް އެ ޖަމިއްޔާއިން ދަނީ ޙަރަކާތްތައް ކުރިއަށްގެންދަމުންނެވެ.