ދުނިޔޭގެ ފެންވަރުގެ މަޝްވަރާތަކުގައި ކުދި ގައުމުތައް ތަމްސީލުކުރުމަކީ ރާއްޖެއަށް ލިބިގެންދާ ބޮޑު ފަޚުރެއްކަމަށް ފޮރިން މިނިސްޓަރ ދުންޔާ މައުމޫން ވިދާޅުވެއްޖެއެވެ.އެކަމަނާ މިހެން ވިދާޅުވީ ކުދި ގައުމުތަކުގެ ބައިނަލްއަޤްވާމީ ޖަމްޢިއްޔާ އެލަޔަންސް އޮފް ސްމޯލް އައިލެންޑް ސްޓޭޓްސް، އެއޯސިސްގެ ފުރަތަމަ ބައްދަލުވުމަށް ފޮނުވި މެސެޖްގައެވެ.ނިއުޔޯކްގައި ބޭއްވި މި ބައްދަލުވުމަކީ އެއޯސިސްގެ ރިޔާސަތާ ރާއްޖެ ހަވާލުވިފަހުން ބޭއްވި ފުރަތަމަ ބައްދަލުވުމެވެ.ފޮރިން މިނިސްޓަރގެ މެސެޖްގައި މި ވަގުތަކީ ކުދި ގައުމުތަކުގެ މުސްތަގުބަލް ހިމާޔަތްކުރާނެ މުހިއްމު އަދި ފައިދާހުރި ނިންމުންތައް ނިންމަންވީ ވަގުތުކަމުގައި ވިދާޅުވިއެވެ. އަދި ކުދި ޤައުމުތަކުގެ ދެމެހެއްޓެނިވި ތަރައްޤީއާއި ތިމާވެށީގެ ދުނިޔޭގެ ފެންވަރުގައި މަޝްވަރާތަކުން ކުދި ޤައުމުތަކަށް އޮތް ފުރުސަތު ކުރިއެރުމުގެ މުހިއްމުކަމުގެ މައްޗަށް އެކަމަނާ އަލިއަޅުވާލައްވާ މި މަޝްވަރާ ތަކުގައި ކުދިގައުމުތަކުގެ ހައްގުތައް ރައްކާތެރިކުރުމަށް ރާއްޖެއިން ފަހެއް ނުޖެހޭނެކަމަށްވެސް ވިދާޅުވިއެވެ.ރާއްޖެއިން އެއޯސިސްގެ ރިޔާސަތާއި މިހަވާލުވީ މުޅި ދުނިޔެވެސް ތަރައްގީގެ ލަނޑުދަނޑިތަކާއި މޫސުމަށް އަންނަ ބަދަލުތަކާއި ގުޅޭގޮތުން މުހިއްމު ނިންމުންތަކެއް ނިންމަމުންދާ އަހަރެއްގައެވެ. އެގޮތުން ޕޯސްޓް ޑިވެލޮޕްމަންޓް އެޖެންޑާ ތަންފީޒުކުރުމާއި މޫސުމަށް އަންނަ ބަދަލުތަކާބެހޭ މުއްހިމު ނިންމުންތަކެއް މިއަހަރުގެ ފަހުކޮޅު ބޭއްވުމަށް ހަމަޖެހިފައިވާކަމަށް ފޮރިން މިނިސްޓްރީން ބުނެއެވެ.މިނިސްޓަރގެ މެސެޖް އިއްވައިދެއްވީ އދ.އަށް ރާއްޖެއިން ކަނޑައަޅާފައިވާ ހުންނަވާ ސަފީރު އަޙްމަދު ސަރީރެވެ.އެއޯސިސްއަކީ ތަރައްގީއާއި ގުޅޭ ގޮންޖެހުންތަކާއި ތިމާވެށްޓާއި ގުޅޭ މައްސަލަތަކުގައި އެއް ވިސްނުމެއް ގެންގުޅޭ ކުދި ޖަޒީރާ ގައުމުތައް ހިމެނޭ އެލަޔަންސްއެކެވެ.ރާއްޖެއިން އެއޯސިސްގެ ޗެއަރކަމަށް ހަވާލުވެފައިވަނީ މި ޖެނުއަރީ މަހުގެ އެއްވަނަ ދުވަހުން ފެށިގެންނެވެ.